Galata Mahkemesi 259 Numaralı Sicil (H. 1137-1138 / 1724-1725) cilt: 63, sayfa: 323 Hüküm no: 353 Orijinal metin no: [51b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ariton v. Mosek’in değirmen ve fırınındaki eşyaları Hüseyin Çelebi b. Ahmed’e sattığı Mahrûse-i Galata dâhilinde Kara Mustafa Paşa mahallesinde vâki‘ değirmen ve çörekci fırınının ustası Ariton v. Mosek nâm Ermeni meclis-i şer‘de işbu râfi‘u’l-vesîka Hüseyin Çelebi b. Ahmed mahzarında ikrâr ve takrîr-i kelâm edip akd-i âtî sudûruna değin zikirleri sebk eden değirmen ve fırın derûnlarında mevcûd eşyâ-yı memlûkemden ma‘lûmetü’l-evsâf on dört re’s bârgir ve altı bürüncük elek ve üç buğday kalburu ve bir sart? ve üç bârgir ihrâmı ve on iki bârgir çulu ve üç şinik ve bir vezne ve bir kantar ve dokuz aded bakır fırın tâbesi ve bir kazgan ve bir sini ve bir tencere ve bir balta ve bir satır ve yirmi panakut? ve iki terazi ve bir tabla ma‘a sepâye ve altı kandil ve dört su kovası ve âlât-ı sâire-i mevcûdeyi kırk bin akçeye değirmen derûnunda mevcûd sekiz yüz keyl hınta beher keyli elli birer akçeden bir[kırk] bin sekiz yüz yirmi akçe ki min haysü’l-mecmû‘ zikirleri mârr olan eşyâ ve hıntayı bi-safkatin vâhidetin tarafeynden îcâb ve kabûlü [hâvî] bey‘-i bâtt-ı sahîh-i şer‘î ile mezbûr Hüseyin Çelebi’ye seksen bir bin sekiz [yüz] yirmi akçeye bey‘ u teslîm ve temlîk edip ol dahi ber-vech-i muharrer iştirâ ve tesellüm ve temellük ve kabûl eyledikden sonra semenleri olan meblağ-ı mecmû‘-ı merkūmu müşterî-i mezbûr yedinden tamâmen alıp kabz eyleyip eşyâ-i merkūmenin aynlarına ve semenlerine müte‘allika âmme-i da‘vâdan müşterî-i mezbûr Hüseyin Çelebi’nin zimmetini ibrâ-i âmm-ı kātı‘u’n-nizâ‘la ibrâ ve ıskāt eyledim fîmâ ba‘d zikirleri sebk eden fırın ve değirmen derûnlarında mevcûd olan eşyâ-i muharrere-i mezkûre ve hınta ve kalîl ve kesîr âlât-ı sâirenin mecmû‘u müşterî-i mezbûr Hüseyin Çelebi’nin mülk-i müşterâsıdır benim kat‘an alâka ve medhalim kalmamışdır keyfe mâ yeşâ ve yahtâr mutasarrıf olsun dedikde gıbbe’t-tasdîki’ş-şer‘î mâ-hüve’l-vâkı‘ bi’l-ibtigā ketb olundu. Fi’l-yevmi’t-tâsi‘ aşer min-Muharremi’l-harâm sene 1138. Şuhûdü’l-hâl: İbrahim Ağa kethudâ-yı habbâzân, Ömer Çelebi yiğitbaşı, Ali Çelebi salcı, el-Hâc Hasan b. el-Hâc Hüseyin, el-Hâc İsmailzâde Ahmed Ağa, Mehmed yazıcı, el-Hâc İsmailzâde Mehmed Ağa, Mehmed Yazıcı, Mercimekoğlu Süleyman çorbacı, Derviş Ali, Mustafa çorbacı C. 9, Ahmed odabaşı, Habbâz Kasım Beşe, Molla Mustafa, Berber Mehmed Çelebi.