Galata Mahkemesi 259 Numaralı Sicil (H. 1137-1138 / 1724-1725) cilt: 63, sayfa: 324 Hüküm no: 354 Orijinal metin no: [51b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Abdullah Çelebi b. Abdülmennan’nın icareteyn ile tasarrufunda olan debbağhaneyi ve içindeki eşyaları Ali Çelebi b. İbrahim’e sattığı Bir def‘a ihrâc olunmuşdur. Mahmiye-i İstanbul’da Çelebioğlu mahallesinde sâkin Abdullah Çelebi b. Abdülmennân nâm kimesne meclis-i şer‘de işbu râfi‘u’l-vesîka Ali Çelebi b. İbrahim nâm kimesne mahzarında ikrâr ve takrîr-i kelâm edip merhûm Sinan Paşa Vakfı’ndan icâreteyn ile taht-ı tasarrufumda olup mahrûse-i Galata a‘mâlinden kasaba-i Kasımpaşa’da Câmi‘-i Kebîr mahallesinde vâki‘ ma‘lûmü’l-hudûd vakıf debbâğhânemi mezbûr Ali Çelebi’ye üç yüz elli guruş bedel mukābelesinde ma‘rifet-i mütevellî ile ferâğ ve tefvîz edip ve zikr olunan debbâğhâne derûnunda mevcûd eşyâ-i memlûkemden bir kazgan ve sekiz tekne ve bir kürek ve iki yüz kara sığır gönlerimi ve bir mikdâr palamut vesâir âlât-ı lâzime-i ma‘lûmemi dahi bi-safkatin vâhidetin tarafeynden îcâb ve kabûlü hâvî bey‘-i bâtt-ı sahîh-i şer‘î ile dört yüz guruşa bey‘ u teslîm edip ol dahi ber-vech-i muharrer iştirâ ve tesellüm ve kabûl eyledikden sonra bedel-i mezkûr üç yüz elli guruş ile semen-i mezbûr dört yüz guruş ki cem‘an yedi yüz elli guruşu mezbûr Ali Çelebi yedinden tamâmen ahz u kabz eyledim ba‘de’l-yevm sâbıku’z-zikr debbâğhâne ile eşyâ-i muharrere-i mezkûre mezbûr Ali Çelebi’nin mülk-i müşterâsı ve hakk-ı müfevvezi olmuşdur keyfe mâ yeşâ ve yahtâr mutasarrıf olsun dedikde gıbbe’t-tasdîki’ş-şer‘î mâ-hüve’l-vâkı‘ bi’l-ibtigā ketb olundu. Fi’l-yevmi’l-ışrîn min-Muharremi’l-harâm sene 1138. Şuhûdü’l-hâl: Mehmed Çelebi b. Ali, el-Hâc Mehmed b. Resul, Abdurrahman Çelebi b. Abdurrrahman, İbrahim Çelebi b. Muharrem, Halil Çelebi b. Mustafa, İbrahim b. Mustafa, Mustafa b. Ahmed, Mustafa b. Receb, Mehmed Çelebi b. Ahmed.