Galata Mahkemesi 259 Numaralı Sicil (H. 1137-1138 / 1724-1725) cilt: 63, sayfa: 325 Hüküm no: 355 Orijinal metin no: [51b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Tarendafilo bt. Kostantin’in Marko v. Dominiko’dan muhalaa ile boşandığı Mahrûse-i Galata‘da Sultan Bayezid mahallesinde sâkine Tarendafilo bt. Kostantin v. Luka nâm Nasrâniye tarafından ber-vech-i âtî hul‘ ve ibrâya vekîl olduğu merkūmenin şahsını ma‘rifet-i şer‘iyye ile ârifân Mustafa Beşe b. Osman ve Yusuf Bey [b.] Abdullah nâm kimesne <> şehâde[tler]iyle sâbit olan babası Kostantin v. Luka nâm zimmî meclis-i şer‘de dâmâdı işbu râfi‘u’r-rakīm Marko v. Dominiko nâm zimmî muvâcehesinde bi’l-vekâle ikrâr ve takrîr-i kelâm edip kızım müvekkile-i mezbûre Tarandafilo’yu zevci işbu mersûm Marko ile beynlerinde hüsn-i zindegâneleri olmayıp hul‘a tâlibe ve râgıbe olmağla zimmetinde mütekarrır ve ma‘kūdün-aleyh olan iki bin akçe mehr-i mü’eccelimden <> ve sagīre kızı Penalute’nin nafakasından dahi fâriğa olmak üzere merkūm Marko ile bi’l-vekâle muhâla‘a-i sahîha-i şer‘iyye ile hul‘ olduğumda ol dahi ber-vech-i muharrer hul‘-i mezbûru kabûl eyledikden sonra hukūk-ı zevciyyete ve cihet-i karz-ı şer‘îden olmak üzere iddi‘â eylediği iki yüz guruşa müte‘allika âmme-i da‘âvî ve mutâlebât ve eymân ve muhâsamâtdan her biri âharın zimmetini ibrâ ve ıskāt eylediler dedikde gıbbe’t-tasdîki’ş-şer‘î mâ-hüve’l-vâkı‘ bi’l-ibtigā ketb olundu. Fi’l-yevmi’t-tâsi‘ aşer min-Muharremi’l-harâm sene 1138. Şuhûdü’l-hâl: İbrahim Çelebi b. Muharrem, Halil Çelebi b. Mustafa, Mustafa b. Ahmed, İbrahim b. Mustafa, Mehmed Bey b. Halil, Mustafa Beşe b. Receb, Mehmed b. Ahmed, Ali b. Abdullah.