Galata Mahkemesi 259 Numaralı Sicil (H. 1137-1138 / 1724-1725) cilt: 63, sayfa: 330 Hüküm no: 362 Orijinal metin no: [53a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Sahak v. Agop’un vefâtına kadar icâresinde olan vakıf menzilin küçük cocukları Karabet, Ariton ve Gevher’e bedel-i misli ile ferağının vasileri Papa Mıgırdıç v. Karabet tarafından talep edildiği Mahrûse-i Galata’da Bereketzâde mahallesinde mütemekkin iken bundan akdem hâlik olan Sahak v. Agop nâm Ermeninin sulbî sagīr oğulları Karabet ve Ariton ve sagīre kızı Gevher’in tesviye-i emrlerini rü’yete kıbel-i şer‘den mansûb vasîleri olan sıgār-ı mezbûrenin li-ebeveyn ammi oğlu işbu râfi‘u’r-rakīm Papa Mıgırdıç v. Karabet meclis-i şer‘de bi’l-vesaye takrîr-i kelâm edip merhûm Ma‘lûlzâde es-Seyyid Mehmed Efendi Vakfı’ndan icâreteyn-i ma‘lûmeteyn ile hâlik-i mezbûrun ile’l-helâk tasarrufunda olup ba‘de helâkihî intikāl-i âdî ile evlâdı sagīrûn-ı mezbûrûna intikāl eden mahalle-i mezbûrede vâki‘ tarafeynden Şahin Ermeni veresesi menzilleri ve bir tarafdan yine benim menzilim ve taraf-ı râbi‘den tarîk-i âm ile mahdûd ve büyût-ı adîde ve müştemilât-ı ma‘lûmeyi muhtevî bir bâb vakıf menzilden gayri bir nesneleri olmayıp ve hâsılı harcına vefâ eylemediğinden mâ‘adâ sıgār-ı mezbûrenin el-yevm nafaka ve kisveye şiddet-i ihtiyâcları olmağın menzil-i mezbûr ma‘rifet-i mütevellî ve bedel-i misli ile âhara ferâğ ve bedeli istirbâh ve hâsıl olan nemâsıyla sagīrûn-ı mezbûrûn infâk ve iksâ olunmak haklarında her vechile hayır ve nâfi‘ olmağın ber-vech-i muharrer bâ-izn-i mütevellî ferâğa kıbel-i şer‘den bana izin verilmek bi’l-vesaye murâdımdır dedikde keyfiyet-i mahkiyeleri mahallinde tefahhus ve suâl için kıbel-i şer‘den mevlânâ Yahya Efendi irsâl olunup ol dahi menzil-i mevkūf-ı mezbûr üzerine varıp Müslimîn huzûrlarında akd-i meclis-i şer‘-i şerîf eyledikde menzil-i mezbûr ve civârında sâkinler olan Bedros v. Ariton ve Toros v. Şahin ve Talis v. Ariton ve Ariton v. Bedros ve Aradik v. Kemerkor ve Kigorok v. Karabet ve Haçador v. Karabet ve Haçador v. Şamak nâm Ermeniler li-ecli’l-ihbâr meclis-i ma‘kūd-ı mezbûra hâzırûn olup isre’l-istişhâd fi’l-vâki‘ sıgār-ı mezbûrenin işbu vakıf menzilden gayri bir nesneleri olmayıp ve hâsılı harcına vefâ eylemediğinden mâ‘adâ sıgār-ı mezbûrenin el-yevm nafaka ve kisveye zarûret ve ihtiyâcları vardır deyü muhbirûn-ı mezbûrûndan her biri alâ-tarîki’ş-şehâde ve’l-ihbâr i‘lâm ve iş‘âr eylediklerini mevlânâ-yı mezbûr mahallinde ketb ü tahrîr ve ma‘an ba‘s olunan Çukadâr Süleyman ve Muhzır Mustafa ile mahfel-i şer‘a gelip alâ-vukū‘ihî inhâ ve takrîr etmeğin mûcebiyle menzil-i mezbûru bedel-i misli ve izn-i mütevellî ile ferâğa vasiyy-i mezbûra kıbel-i şer‘den izin verilip mâ-vaka‘a bi’l-ibtigā ketb olundu. Fi’l-yevmi’s-sânî ve’l-ışrîn min-Muharremi’l-harâm sene 1138. Şuhûdü’l-hâl: Mustafa b. Receb, İbrahim b. Mustafa, Bursalı Mehmed muhzır, Yusuf b. Abdullah, Ali Bey b. Abdullah, Bekir Bey b. Ahmed, Ahmed b. Mustafa.