Galata Mahkemesi 259 Numaralı Sicil (H. 1137-1138 / 1724-1725) cilt: 63, sayfa: 331 Hüküm no: 363 Orijinal metin no: [53a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Sahak v. Agop’un küçük çocukları Karabet, Ariton ve Gevher için anneleri Sara bt. Ariton’un talebi üzerine nafaka takdir edildiği Mahrûse-i Galata’da Bereketzâde mahallesinde sâkin iken bundan akdem hâlik olan Sahak v. Agop nâm Ermeninin sulbî sagīr oğulları Karabet ve Ariton ve sagīre kızı Gevher’in anaları olup zâtı ta‘rîf-i şer‘î ile mu‘arrefe olan işbu bâ‘isetü’l-vesîka Sara bt. Ariton nâm nasrâniye meclis-i şer‘de takrîr-i kelâm edip bi-hükmi’-hıdâne hacr ve terbiyemde olan sıgār-ı mezbûrenin el-yevm nafaka ve kisveye zarûret ve ihtiyâcları olmağın babaları hâlik-i mezbûrdan intikāl eden sıgār-ı mezbûrenin zarûret-i nafakalarıʼçün ferâğat olunan vakıf menzilleri bedeli olan dört yüz guruşun her onu on bir buçuk hesâbı üzere hâsıl olan nemâsından nafaka ve kisveleri için kıbel-i şer‘den kadr-ı ma‘rûf meblağ farz ve takdîr olunması murâdımdır dedikde hâkim-i muvakkı‘-ı sadr-ı kitâb tûbâ-lehû ve hüsnü-meâb hazretleri dahi sıgār-ı mezbûrenin nafaka ve kisve ve levâzım-ı zâruriyeleriʼçün ber-vech-i meşrûh bedel-i mezkûr nemâsından târih-i kitâbdan her birine yedişer akçeden külle yevmin yirmi bir akçe farz ve takdîr eyleyip ve meblağ-ı mefrûz-ı mezkûru sıgār-ı mezbûrenin nafaka ve kisve ve levâzım-ı zâruriyelerine harc ve sarfa ve lede’l-iktizâ istidâneye ve ınde’z-zafer rücû‘a mezbûre Sara’ya izin vermeğin mâ-vaka‘a bi’l-ibtigā ketb olundu Fi’l-yevmi’s-sâlis ve’l-ışrîn min-Muharremi’l-harâm sene 1138. Şuhûdü’l-hâl: es-Sâbıkūn.