Galata Mahkemesi 259 Numaralı Sicil (H. 1137-1138 / 1724-1725) cilt: 63, sayfa: 332 Hüküm no: 364 Orijinal metin no: [53a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Eyübi Derviş Hüseyin b. Hasan’ın Rus asıllı kölesi İvaz b. Abdullah’ı azat ettiği Husûs-ı âti’l-beyânın mahallinde ketb ü tahrîri iltimâs olunmağın kıbel-i şerî‘at-ı garrâdan mevlânâ Halil Efendi b. Hüseyin me’zûnen irsâl olunup ol dahi Havâss-ı Refîa kazâsına tâbi‘ Eğrikapı hâricinde vâki‘ el-Hâc Hüsrev mahallesinde sâkin umdetü’l-fukarâi’l-mevleviye Eyübî Derviş Hüseyin b. Hasan b. Şükrü’nün menziline varıp zeyl-i vesîkada muharrerü’l-esâmî Müslimîn huzûrlarında akd-i meclis-i şer‘-i nebevî eyledikde mezbûr Derviş Hüseyin meclis-i ma‘kūd-ı mezkûrda kendüye rıkk-ı sâbıkını mu‘terif olan Galata’da sâkin orta boylu açık kaşlı gök gözlü Rusiyyü’l-asl Müslimü’l-mille râfi‘u hâzihi’l-kabâle İvaz b. Abdullah mahzarında ikrâr ve takrîr-i kelâm edip mevsûf-ı mezbûr İvaz’ı târih-i kitâbdan yirmi sene mukaddem abd-i memlûkum olduğu hâlde hasbeten lillâhi’l-aliyyi’l-a‘lâ ve haseneten li-rûhi resûli’l-mu‘allâ mâlımdan tahrîr ve i‘tâk ve kayd-ı rıkdan ihrâc ve ıtlâk eylemiş idim binâen alâ-zâlik mevsûf-ı mezbûr İvaz târih-i mezbûrdan beri sâir ahrâr-ı asliyyîn gibi hür olup üzerinde velâ-i şer‘îden gayri hakkım bâkī kalmamışdır dedikde gıbbe’t-tasdîki’ş-şer‘î vâki‘ hâli mevlânâ-yı mezkûr mahallinde ketb ü tahrîr ve ma‘an ba‘s olunan Sırmakeş Mustafa ile meclis-i şer‘a gelip alâ-vukū‘ihî inhâ ve takrîr etmeğin mâ-hüve’l-vâkı‘ bi’l-ibtigā ketb olundu. Fi’l-yevmi’s-sâdis ve’l-ışrîn min-Muharremi’l-harâm sene semân ve selâsîn ve mi’e ve elf. Şuhûdü’l-hâl: Hacızâde Ahmed Çelebi, Ali Beşe b. Mehmed, Hacı Halilzâde Mehmed Ağa, Derviş Ahmed neyzenbaşı ve gayrühum.