Galata Mahkemesi 259 Numaralı Sicil (H. 1137-1138 / 1724-1725) cilt: 63, sayfa: 332 Hüküm no: 365 Orijinal metin no: [53b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Şöhret v. Kirkor’un vârislerinden Derhi’nin hissesini kardeşi Mikail’e sattığı Mahrûse-i Galata muzâfâtından Beşiktaş nâhiyesine tâbi‘ Ortaköy sükkânından iken bundan akdem hâlik olan Şöhret v. Kirkor v. Şöhret nâm Ermeninin verâseti sulbî kebîr oğulları Mikail ve Gabril nâm Ermenilere ve sulbiye-i kebîre kızları Luzi ve Derohi ve Serpohi nâm Ermeniyelere münhasıra ve tashîh-i meseleleri bi-hükmi’l-ferâiz yedi sehimden i‘tibâr olunmağla sihâm-ı mezbûreden ikişer sehmi merkūmân Mikail ve Kabril’den her birine ve birer sehmi mezbûrât Luzi ve Derohi ve Serapohi’den her birine isâbet eylediği lede’ş-şer‘i’l-enver zâhir ve mukarrer oldukdan sonra şahsı Bogos v. Gasper ve Ariton v. Abraham Ermeniler ta‘rîfleriyle mu‘arrefe olan merkūme Derohi meclis-i şer‘de işbu hâmilü’r-rakīm karındaşı mezbûr Mikail muvâcehesinde bi-tav‘ihâ ikrâr ve takrîr-i kelâm edip mûrisimiz hâlik-i merkūm Şöhret’den verese-i mezbûresine mevrûs olup karye-i mezbûrede vâki‘ mezbûr Şöhret’e intimâ ile tahdîd ve tavsîfden müstağnî mülk menzil ve bahçe ve arsa-i hâliye ve müste’cirîn odaları ve kürûmu mülk bağ ve mahrûse-i mezbûre hâricinde Hüseyin Ağa mahallesinde vâki‘ lede’l-ahâlî ve’l-cîrân ma‘lûmü’l-hudûd mülk arsa-i hâliye ve ber mûceb-i defter-i müfredât beynimizde ma‘lûm esâs-ı beyt ve evânî-i nühâsiye ve gayr-i nühâsiye tashîh-i mezbûr üzere mülk ve hakkım olan bir sehm hisse-i irsiyye-i şâyi‘amı karındaşım mezbûr Mikail’e tarafeynden îcâb ve kabûlü hâvî bey‘-i bâtt-ı sahîh-i şer‘î ile bi-safkatin vâhidetin iki yüz guruşa bey‘ u temlîk ve teslîm eylediğimde ol dahi ber-vech-i muharrer iştirâ ve temellük ve tesellüm ve kabûl eyledikden sonra semeni olan meblağ-ı mezbûr iki yüz guruşu karındaşım mezbûr Mikail yedinden tamâmen ba‘de’l-ahz ve’l-kabz mârrü’z-zikr emlâk ve eşyâdan bir sehm hisse-i şâyi‘am aynîlerine ve semenlerine müte‘allika âmme-i da‘vâdan mezbûr Mikail’in zimmetini ibrâ ve ıskāt eyledim binâenaleyh zikirleri sebk eden emlâk ve eşyâda olan bir sehm hisse-i şâyi‘am karındaşım mezbûr Mikail’in mülk-i müşterâsıdır keyfe mâ yeşâ ve yahtâr mutasarrıf olsun dedikde gıbbe’t-tasdîki’ş-şer‘î mâ-hüve’l-vâkı‘ bi’l-ibtigā ketb olundu. Fi’l-yevmi’l-ışrîn min-Muharremi’l-harâm sene 1138. Şuhûdü’l-hâl: Kahveci İvaz Beşe, Osman Çelebi, İbrahim Çelebi, el-Hâc Ahmed, İmâm Hüseyin Efendi, Serbölük Halil Ağa, Sırmakeş Mustafa, Bursa[lı] Mehmed.