Galata Mahkemesi 259 Numaralı Sicil (H. 1137-1138 / 1724-1725) cilt: 63, sayfa: 333 Hüküm no: 366 Orijinal metin no: [53b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Şöhret v. Kirkor’un vârislerinden Luzi, Derohi ve Serpohi’nin hissesini kardeşleri Mikail’e sattığı Mahrûse-i Galata muzâfâtından Beşiktaş nâhiyesine tâbi‘ Ortaköy sükkânından iken bundan akdem hâlik olan Şöhret v. Kirkor v. Şöhret nâm Ermeninin verâseti sulbî kebîr oğulları Mikail ve Gabril nâm Ermenilere ve sulbiye kebîre kızları Luzi ve Derohi ve Serpohi nâm Ermenilere münhasıra ve tashîh-i meseleleri bi-hükmi’l-ferâiz yedi sehimden i‘tibâr olunup sihâm-ı mezbûreden ikişer sehmi merkūmân Mikail ve Kabril’den her birine ve birer sehmi mezbûrât Luzi ve Derohi ve Serpohi’den her birine isâbet eylediği lede’ş-şer‘i’l-enver zâhir ve mukarrer oldukdan sonra şahsı Bogos v. Gasper ve Ariton v. Abraham nâm Ermeniler ta‘rîfleriyle mu‘arrefe olan mezbûre Luzi meclis-i şer‘de işbu hâmilü’r-rakīm karındaşı mezbûr Mikail muvâcehesinde bi-tav‘ihâ ikrâr ve takrîr-i kelâm edip mûrisimiz hâlik-i merkūm Şöhret’den verese-i mezbûresine mevrûse olup karye-i mezbûrede vâki‘ merkūme Şöhret’e intimâ ile tahdîd ve tavsîfden müstağnî mülk menzil ve bahçe ve arsa-i hâliye ve müste’cirîn odaları ve kürûmu mülk bağ ve mahrûse-i mezbûre hâricinde Hüseyin Ağa mahallesinde vâki‘ lede’l-ahâlî ve’l-cîrân ma‘lûmü’l-hudûd arsa-i hâliye ve ber-mûceb-i defter-i müfredât beynimizde ma‘lûm esâs-ı beyt ve evânî-i nühâsiye ve gayr-ı nühâsiyeden karındaşım mezbûr Gabril tashîh-i mezbûr üzere iki sehm hisse-i irsiyye-i şâyi‘sını işbu yedimde olan hüccet nâtıka olduğu üzere mukaddemâ semen-i ma‘lûma bana bey‘ etmeğle zikr olunan emlâk <> ve eşyanın üç sehm hisse-i şâyi‘ası irsen ve şirâen benim mâlım ve mülküm olmağın hâlâ ben sâlifü’z-zikr emlâk ve eşyâda mülk ve hakkım olan üç sehm hisse-i şâyi‘a-i şer‘iyyemi karındaşım mezbûr Mikail’e tarafeynden îcâb ve kabûlü hâvî bey‘-i bâtt-ı sahîh-i şer‘î ile bi-safkatin vâhidetin yedi yüz guruşa bey‘ u temlîk ve teslîm eylediğimde ol dahi ber-vech-i muharrer iştirâ ve temellük ve tesellüm ve kabûl eyledikden sonra semeni olan meblağ-ı mezbûr yedi yüz guruşu karındaşım mezbûr Mikail yedinden tamâmen ba‘de’l-ahz ve’l-kabz mârrü’z-zikr emlâk ve eşyâdan üç sehm hisse-i şâyi‘amın aynlarına ve semenlerine müte‘allika âmme-i da‘vâdan mezbûr Mikail’in zimmetini ibrâ ve ıskāt eyledim binâenaleyh zikirleri sebk eden emlak ve eşyâda olan üç sehm hisse-i şâyi‘am karındaşım mezbûr Mikail’in mülk-i müşterâsı olmuşdur keyfe mâ yeşâ ve yahtâr mutasarrıf olsun dedikde gıbbe’t-tasdîki’ş-şer‘î mâ-hüve’l-vâkı‘ bi’l-ibtigā ketb olundu. Fi’l-yevmi’s-sâlis ve’l-ışrîn min-Muharremi’l-harâm sene 1138. Şuhûdü’l-hâl: es-Sâbikūn.