Galata Mahkemesi 259 Numaralı Sicil (H. 1137-1138 / 1724-1725) cilt: 63, sayfa: 334 Hüküm no: 367 Orijinal metin no: [53b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Safiye bt. Abdullah’ın Mehmed b. Hüseyin’den muhalaa ile boşandığı Mahrûse-i Galata hâricinde Hüseyin Ağa mahallesinde sâkine verâseti Hasan b. İbrahim ve diğer Hasan b. Mustafa nâm kimesneler ta‘rîfleriyle mu‘arrefe olan Safiye bt. Abdullah nâm hâtun meclis-i şer‘de zevc-i muhâlı‘ı işbu râfi‘u’l-kitâb Mehmed b. Hüseyin nâm kimesne mahzarında ikrâr ve takrîr-i kelâm edip zevcim mezbûr Mehmed ile beynimizde adem-i hüsn-i mu‘âşeretden nâşî hul‘a tâlibe ve râgıbe olduğum ecilden zimmetinde mütekarrır ve ma‘kūdün-aleyh olan bin beş yüz akçe mehr-i mü’eccelimden geçip nafaka-i iddet ve me’ûnet-i süknâm dahi kendi üzerime olmak üzere zevcim mezbûr Mehmed ile muhâla‘a-i sahîha-i şer‘iyye ile hul‘ olduğumda ol dahi ber-vech-i muharrer hul‘-i mezbûru ba‘de’l-kabûl hukūk-ı zevciyyete müte‘allika âmme-i da‘vâdan her birimiz âharın zimmetini ibra ve ıskāt eyledik dedikde gıbbe’t-tasdîki’ş-şer‘î mâ-hüve’l-vâkı‘ bi’l-ibtigā ketb olundu. Fi’l-yevmi’s-sâmin ve’l-ışrîn min-Muharremi’l-harâm sene 1138. Şuhûdü’l-hâl: Halil Çelebi b. Mustafa, Mustafa b. Ahmed, Mehmed b. Ahmed, Süleyman b. Ahmed, Ali b. Abdullah.