Galata Mahkemesi 259 Numaralı Sicil (H. 1137-1138 / 1724-1725) cilt: 63, sayfa: 335 Hüküm no: 369 Orijinal metin no: [54a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Saltana bt. Sakar’ın Rus asıllı kölesi Anna bt. Keto’yu azat ettiği El-emru hasbemâ yahvîhi nemakahu’l-fakīr ileyhi sübhânehû el-Hâc Mustafa el-Kādî bi-medîneti Galata -gufira lehû-. Mahrûse-i Galata’ya tâbi‘ kasaba-i Beşiktaş’da Sinan Paşa-yı Kebîr mahallesinde sâkine iken bundan akdem hâlike olan Saltana bt. Sakar nâm Ermeniyenin li-ebeveyn kız karındaşı oğlu ve zî-rahm cihetinden hasren vârisi olan Vartan v. Asvador nâm Ermeni meclis-i şer‘de hâlike-i mezbûreye rıkk-ı sâbıkını mu‘terife olan işbu orta boylu açık kaşlı kara gözlü Rusiyyetü’l-asl kâfiretü’l-mille bâ‘isetü hâzihi’l-kabâle Anna bt. Keto muvâcehesinde bi’l-verâse ikrâr ve takrîr-i kelâm edip mevrûsemiz hâlike-i merkūme Saltana câriye-i memlûkesi olan mevsûfe-i mezbûre Anna’yı yedinde olan hüccet-i şer‘iyye nâtıka olduğu üzere hâl-i sıhhatinden helâkine değin kendüye dahi hizmet edip hâlike oldukda cemî‘ sülüs-i mâlımdan âzâd ola deyü müdebbire etmiş idi hâlâ mezbûre Saltana hâlike olup ve mezbûre Anna’nın kıymetine hâlike-i mezbûrenin sülüs-i mâlı her vechile müsâ‘id olmağla mezbûre Anna merkūme Saltana’nın cemî‘ sülüs-i malından âzâd olmuşdur binâenaleyh mevsûfe-i mezbûre Anna’da benim kat‘an alâka ve medhalim kalmamışdır keyfemâ teşâ ve tahtâr mutasarrıfa olsun dedikde gıbbe’t-tasdîki’ş-şer‘î mâ-hüve’l-vâkı‘ bi’l-ibtigā ketb olundu. Fi’l-yevmi’s-sâlis ve’l-ışrîn min-Muharremi’l-harâm sene 1138. Şuhûdü’l-hâl: el-Hâc Mehmed b. el-Hâc Ahmed, Bekir Çelebi b. Hüseyin, Ahmed Bey b. Mustafa, Yahya Efendi b. Yusuf, Sarrac Hasan Beşe, Bursalı Mehmed.