Galata Mahkemesi 259 Numaralı Sicil (H. 1137-1138 / 1724-1725) cilt: 63, sayfa: 336 Hüküm no: 370 Orijinal metin no: [54a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Yemenici Mustafa Çelebi’nin vârislerinden kız kardeşi Ayşe Hatun’un menzilden kendisine düşen üç hissesini el-Hâc İbrahim b. Mustafa’ya sattığı Mahrûse-i Galata a‘mâlinden kasaba-i Kasımpaşa’da el-Hâc Ferhad mahallesinde sâkin iken bundan akdem vefât eden Yemenici Mustafa Çelebi b. Abdullah’ın verâseti kebîre kızları Emine ve Havva ve Emetullâh nâm hâtunlara ve li-ebeveyn kız karındaşı Âişe Hâtun’a münhasıra ve tashîh-i meseleleri bi-hükmi’l-ferâiz dokuz sehimden i‘tibâr olunup sihâm-ı merkūmeden ikişer sehmi merkūmât Emine ve Havva ve Emetullâh’dan her birine ve üç sehmi merkūme Âişe Hâtun’a isâbet eylediği lede’ş-şer‘i’l-enver zâhir ve mukarrer oldukdan sonra zâtı Mustafa Çelebi b. Mehmed ve el-Hâc Hüseyin b. Abdullah nâm kimesneler ta‘rîfleriyle mu‘arrefe olan merkūme Âişe Hâtun mahfil-i şer‘de işbu râfi‘u’l-vesîka el-Hâc İbrahim b. Mustafa mahzarında ikrâr ve takrîr-i kelâm edip karındaşım müteveffâ-yı mezbûr Yemenici Mustafa Çelebi’nin terekesinden olup mahalle-i merkūmede vâki‘ bir tarafdan Mustafa Çavuş menzili ve bir tarafdan İstemihan Hâtun menzili ve bir tarafdan Çorbacıkızı menzili ve bir tarafdan ba‘zen el-Hâc Ali menzili ve ba‘zen tarîk-i hâs ile mahdûd fevkāni üç bâb oda ve bir matbah ve bir sofa ve tahta-pûş ve tahtânî bir bâb oda ve mağsel ve kenîf ve müşterek bi’r-i mâ ve bir mikdâr havluyu müştemil mülk menzilin tashîh-i mezbûr üzere dokuz sehimde üç sehm-i şâyi‘i ber-vech-i muharrer bana mevrûs olmağın hâlâ ben menzil-i mahdûd-ı mezbûrda olan mikdâr-ı mezkûr hisse-i irsiyyemi cemî‘ tevâbi‘ ve levâhıkı ve kâffeti’l-menâfi‘ ve’l-merâfıkıyla tarafeynden îcâb ve kabûlü hâvî bey‘-i bâtt-ı sahîh-i şer‘î ile mezbûr el-Hâc İbrahim’e târih-i kitâbdan on altı ay mukaddem elli guruşa bey‘ u teslîm eylediğimde ol dahi ber-vech-i muharrer iştirâ ve tesellüm ve kabûl eyledikden sonra semeni olan meblağ-ı mezbûr elli guruşu müşterî-i mezbûr el-Hâc İbrahim yedinden tamâmen alıp kabz eyledim binâenaleyh menzil-i mahdûd-ı merkūmda olan dokuz sehimde üç sehm hisse-i irsiyyem bi-cümletin mâ yeştemilühâ târih-i mezbûrdan beri müşterî-i merkūm el-Hâc İbrahim’in mülk-i müşterâsıdır benim kat‘an alâka ve medhalim yokdur keyfe mâ yeşâ ve yahtâr mutasarrıf olsun dedikde gıbbe’t-tasdîki’ş-şer‘î mâ-hüve’l-vâkı‘ bi’l-ibtigā ketb olundu. Fi’l-yevmi’t-tâsi‘ ve’l-ışrîn min-Muharremi’l-harâm sene 1138. Şuhûdü’l-hâl: Arusi Mustafa Efendi, Katib Ahmed Efendi, Katib Osman Efendi, Katib Mustafa Efendi, el-Hâc Hüseyin b. Abdullah, el-Hâc Ali b. Abdülkerîm, Zindani el-Hâc Ahmed.