Galata Mahkemesi 259 Numaralı Sicil (H. 1137-1138 / 1724-1725) cilt: 63, sayfa: 337 Hüküm no: 371 Orijinal metin no: [54b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Şerife Fatıma bt. es-Seyyid İsmail’in vârislerinin hisselerini Mustafa b. Abdülkadir’den aldıkları Mahrûse-i Galata hâricinde Bedreddin Bey mahallesinde sâkine iken bundan akdem vefât eden Şerife Fâtıma bt. es-Seyyid İsmail b. Abdullah nâm hâtunun verâseti zevc-i metrûku Mustafa b. Abdülkādir nâm kimesneye ve anası Zeyneb bt. Abdülkerîm nâm hâtuna ve li-ebeveyn er karındaşı es-Seyyid Hüseyin ile li-ebeveyn kız karındaşları Şerife Zeyneb ve Şerife Emine nâm sagīrlere münhasıra ve tashîh-i meseleleri bi-hükmi’l-ferâiz on iki sehimden olmağla sihâm-ı mezbûreden altı sehmi mezbûr Mustafa’ya ve iki sehmi mezbûre Zeyneb Hâtun’a ve iki sehmi mezbûr es-Seyyid Hüseyin’e ve birer sehmi sagīretân-ı mezbûretân Şerife Zeyneb ve Şerife Emine’den her birine isâbet eylediği lede’ş-şer‘i’l-enver zâhir ve mukarrer oldukdan sonra mezbûr es-Seyyid Hüseyin asâleten ve mezbûre Zeyneb Hâtun kendi tarafından asâleten ve sagīre kızları mezbûretân Şerife Zeyneb ve Şerife Emine’nin tesviye-i umûrlarına kıbel-i şer‘den mansûb vasîleri olmağla vesayeten meclis-i şer‘de tereke-i müteveffât-ı mezbûre vâzı‘u’l-yed olan işbu râfi‘u’l-kitâb mezbûr Mustafa mahzarında her biri bi’l-asâle ve bi’l-vesaye ikrâr ve takrîr-i kelâm edip mûrisemiz müteveffât-ı mezbûre Şerife Âişe Hâtun’un mecmû‘-ı tereke ve mehr-i mü’eccelini bi’t-terâzî beynimizde iktisâm ve her birimiz tashîh-i mezbûr üzerine hisselerimizi mezbûr Mustafa yedinden bi’l-asâle ve bi’l-vesaye ahz u kabz eylediğimizden sonra müteveffât-ı mezbûre Şerife Âişe Hâtun’un kalîl ü kesîr terekesine müte‘allika âmme-i da‘vâdan mezbûr Mustafa’nın zimmetini ibrâ ve ıskāt eyledik dediklerinde gıbbe’t-tasdîki’ş-şer‘î mâ-hüve’l-vâkı‘ bi’l-ibtigā ketb olundu. Fi’l-yevmi’s-sâdis ve’l-ışrîn min-Muharremi’l-harâm sene 1138. Şuhûdü’l-hâl: es-Seyyid Mahmud Efendi, es-Seyyid Hasan oturakcı, Mehmed Çelebi b. Hüseyin, Mustafa Çelebi b. Ramazan, Manav Abdi Çelebi, Kalafatcı Hüseyin Çelebi, İbrahim b. Muharrem.