Galata Mahkemesi 259 Numaralı Sicil (H. 1137-1138 / 1724-1725) cilt: 63, sayfa: 338 Hüküm no: 373 Orijinal metin no: [54b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Muhyiddin Efendi mahallesi avarızına mütevellî Fatıma bt. el-Hâc Salih’in ihracıyla yerine el-Hâc Ali b. Osman’ın tayin edildiği Mahrûse-i Galata a‘mâlinden kasaba-i Tophâne’de vâki‘ Muhyiddin Efendi mahallesinin avârızına mevkūfe nükūdun vazîfe-i mu‘ayyene ile bâ-hüccet-i şer‘iyye bi’l-fi‘il mütevelliyesi olan Fâtıma bt. el-Hâc Salih nâm hâtunun sefîhe ve müflise ve medyûne ve vakfa hâyine olmağla yedinde olan mâl-ı vakfı ekl ve bel‘ ve telef birle vakfa külli gadr eylediği ecilden tevliyetden her vechile ref‘i lâzım geldiği mahalle-i merkūme imâmı Osman Efendi b. Abdullah ve müezzin Mustafa Halife b. İbrahim ve kayyum Molla Ahmed b. Mahmud ve ahâlîsinden Mehmed Efendi b. Osman ve es-Seyyid Abdullah Efendi b. Mehmed ve Çaşnigir Hasan Ağa b. Abdülkerîm ve Abdulbâki Çelebi b. Mustafa ve el-Hâc Hasan b. Mehmed ve el-Hâc Mustafa b. Mehmed ile sâir zeyl-i vesîkada isimleri muharrer olan bî-garaz cemm-i gafîr Müslimîn ihbârlarıyla lede’ş-şer‘i’l-enver zâhir ve mütebeyyin olmağın hâkim-i muvakkı‘-ı a‘le’l-kitâb tûbâ-lehû ve hüsnü-meâb efendi hazretleri dahi merkūme Fâtıma Hâtun’u tevliyetden ref‘ ve yerine mahalle-i merkūme ahâlîsinden olup her vechile mu‘temed ve müstakīm ve hizmet-i mezbûre uhdesinden gelmeğe kādir olduğu yine mahalle-i mezbûre ahâlîsinin haberleriyle zâhir olan işbu ref‘u’l-[râfi‘u’l-]vesîka el-Hâc Ali b. Osman’ı cümlenin taleb ve iltimâs ve re’yi ve ittifâklarıyla vakf-ı merkūma mütevellî nasb ve ta‘yîn eyledikde ol dahi ber-vech-i muharrer tevliyet-i mezbûreyi kabûl ve mahallinde hıdemât-ı lâzimesini ikāmete ta‘ahhüd etmeğin mâ-hüve’l-vâkı‘ bi’l-ibtigā ketb olundu. Fi’l-yevmi’s-sâdis min-Muharremi’l-harâm sene 1138. Şuhûdü’l-hâl: Taşcı Mehmed Çelebi, Ali Çelebi b. Mustafa, Mustafa Çelebi b. Abdullah, Hüseyin Çelebi b. Abdullah, Süleyman b. Şa‘ban, Mehmed Çelebi b. Ali, Mustafa Çelebi b. Hüseyin, Mehmed b. Ahmed, İbrahim Çelebi b. Hüseyin, Osman Çelebi b. Abdullah, Hacızâde Mehmed Çelebi.