Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 809 Hüküm no: 1054 Orijinal metin no: [126a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Süleyman Çelebi b. Yusuf’un, Mano v. Niko’dan buğday bahasından alacaklı olduğu Navulcu tâifesinden Süleyman Çelebi b. Yusuf nâm kimesne meclis-i şer‘-i hatîr-i lâzımü’t-tevkīrde mahmiye-i İstanbul’da Samanlı Hamamı kurbunda vâki‘ ekmekçi fırınında habbâz olan Mano v. Niko nâm zimmî muvâcehesinde üzerine da‘vâ ve takrîr-i kelâm edip merkūm Mano zimmetinde yedimden müşterâ ve makbûz doksan yedi buçuk keyl buğday semeninden altı bin beş yüz seksen beş akçe hakkım olup mukaddemâ merkūm Mano meblağ-ı mezbûrun bin akçesini bana teslîm etmeğin bâkī beş bin beş yüz akçe hakkım zimmetinde kalmağın taleb ederim suâl olunsun dedikde gıbbe’s-suâl merkūm Mano müdde‘î-i merkūm yedinden müşterâ ve makbûz doksan yedi buçuk keyl buğday semeninden bâkī zimmetinde vâcibü’l-edâ bin beş yüz seksen beş akçe deyni olduğu[nu] tâyi‘an ikrâr etmeğin mûcebince meblağ-ı bâkī-i mezbûru müdde‘î-i merkūma edâya mezbûr Mano’ya tenbîh olunup mâ hüve’l-vâki‘ bi’t-taleb ketb olundu. Fi’l-yevmi’r-râbi‘ aşer min Şevvâli’l-mükerrem li sene seb‘a ve seb‘în ve elf. Şuhûdü’l-hâl: Abdi Çelebi b. Hüseyin, Mehmed Çelebi b. Abdülmennân, İbrahim Çelebi b. Ahmed, Resul [b.] Ramazan.