Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 809 Hüküm no: 1055 Orijinal metin no: [126a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Meleki bt. Muslihiddin’in, evini Mehmed Ağa b. Ahmed’e sattığı Mahmiye-i İstanbul’da Sarıgerz’de Kâtib Muslihiddin mahallesinde sâkine olan Melekî bt. Muslihiddin nâm hâtun tarafından husûs-ı âti’l-beyâna vekîl olup zâtını ma‘rifet-i şer‘iyye ile ârifân li ebeveyn karındaşı Ahmed Beşe ve İmâmzâde Mustafa Bey b. Musa şehâdetleriyle şer‘an vekâleti sâbite olan Mustafa Bey b. Abdullah meclis-i şer‘-i [126b] hatîr-i lâzımü’t-tevkīrde işbu bâ‘isü’l-kitâb fahrü’l-emâsil ve’l-akrân Mehmed Ağa b. Ahmed ez-Za‘îm mahzarında bi’l-vekâle ikrâr ve takrîr-i kelâm edip müvekkilem mezbûrenin silk-i mülk-i sahîhinde münselik olup mahrûse-i Galata müzâfâtından İstinye nâhiyesine tâbi‘ Boğazkesen kasabası mahallâtından el-Hâc Kemaleddin mahallesinde vâki‘ bir tarafı el-Hâc Receb mülkü ve bir tarafı Kenan Bey b. Abdullah mülkü ve iki tarafı tarîk-i âm ile mahdûd üç bâb odayı ve bir sofayı ve dehlizi ve matbahı ve ahırı ve kenîfi ve bi’r-i mâyı ve zât-ı eşcâr-ı müsmire ve gayr-ı müsmire ve bahçeyi müştemil menzilini bi cümleti’t-tevâbi‘ ve’l-levâhık ve kâffeti’l-menâfi‘ ve‘l-merâfık müvekkile-i mezbûre Mehmed Ağa’ya yirmi üç bin beş yüz cedîd nakid râyic fi’l-vakt akçeye tarafeynden îcâb ve kabûlü hâvî bey‘-i bâtt-ı sahîh-i şer‘î ile bey‘ ve teslîm ol dahi vech-i muharrer üzre iştirâ ve kabûl ve kabz ve tesellüm eyledikden sonra semeni olan meblağ-ı mezbûr yirmi üç bin beş yüz akçeyi müvekkilem mezbûre müşterî-i mezbûr yedinden tamâmen ahz u kabz eyledi ba‘de’l-yevm menzil-i mahdûd-ı mezbûr müşterî-i merkūm Mehmed Ağa’nın mülk-i müşterâsıdır, keyfe mâ yeşâ’ ve yahtâr mutasarrıf olsun dedikde gıbbe’t-tasdîk mâ hüve’l-vâki‘ bi’t-taleb ketb olundu. Fi’l-yevmi’r-râbi‘ aşer min Şevvâli’l-mükerrem li sene seb‘a ve seb‘în ve elf. Şuhûdü’l-hâl: Fahrü’l-müderrisîn Mehmed Efendi el-Muhâsib, Esad Çelebi b. Mehmed, Veli Efendi b. Hüseyin, Mehmed Çelebi b. Ahmed, Hasan Çelebi b. Ahmed, İbrahim Çelebi b. Ali.