Galata Mahkemesi 259 Numaralı Sicil (H. 1137-1138 / 1724-1725) cilt: 63, sayfa: 344 Hüküm no: 382 Orijinal metin no: [56a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Zeyneb bt. el-Hâc Hasan’ın Mustafa b. Mehmed’den muhalaa ile boşandığı Mahrûse-i Galata’da el-Hâc A‘mâ mahallesinde sâkine olup zâtı Mustafa b. Ali ve Ahmed b. el-Hâc Hasan nâm kimesneler ta‘rîfleriyle mu‘arrefe olan Zeyneb bt. el-Hâc Hasan nâm hâtun meclis-i şer‘de zevc-i gayr-i medhûlün-bihâsı işbu râfi‘u’l-vesîka Mustafa b. Mehmed nâm kimene mahzarında ikrâr ve takrîr-i kelâm edip mezbûr Mustafa zevcim olup bana dâhil olmayıp halvet-i sahîha olmaksızın beynimizde şikāk vâki‘ olmağla hul‘a tâlibe ve râgıbe olduğum ecilden zimmetinde mütekarrır ve ma‘kūdün-aleyh olan on bir buçuk guruş mehr-i mü’eccelimin ancak nısfı lâzım gelip nafaka-i iddet ve me’ûnet-i süknâm lâzım gelmemeğin ben dahi nısf mehr-i mü’eccelim olan beş guruş üç rub‘ üzerine zevcim mezbûr Mustafa ile muhâla‘a-i sahîha-i şer‘iyye ile hul‘ olduğumda ol dahi ber-vech-i muharrer hul‘-ı mezbûru ba‘de’l-kabûl hukūk-ı zevciyyete müte‘allika vesâire âmme-i da‘vâdan her birimiz âharın zimmetini ibrâ ve ıskāt eyledik dedikde gıbbe’t-tasdîki’ş-şer‘î mâ-hüve’l-vâkı‘ bi’l-ibtigā ketb olundu. Fi’l-yevmi’s-sâmin ve’l-ışrîn min-Muharremi’l-harâm sene 1138. Şuhûdü’l-hâl: İbrahim b. Muharrem, Halil b. Mustafa, Mustafa b. Ahmed, Ömer Efendi b. Muharrem, Molla İbrahim el-mukayyid, Mehmed b. Ahmed.