Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 811 Hüküm no: 1057 Orijinal metin no: [126b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mehmed Çavuş b. Himmet’in, İsar v. Melkon’daki alacağına Tatos’un kefil olduğu iddiasını ispat edemediği Mahmiye-i İstanbul’da Dâye Hâtun Mahallesi sâkinlerinden Mehmed Çavuş b. Himmet nâm kimesne meclis-i şer‘-i şerîf-i lâzımü’t-teşrîfde işbu bâ‘isü’s-sifr Tatos v. Asfor nâm zimmî muvâcehesinde üzerine da‘vâ ve takrîr-i kelâm edip gāib ani’l-meclis İsar v. Melkon nâm zimmî zimmetinde cihet-i karz-ı şer‘îden hakkım olan beş bin yüz elli akçesin mezbûr İsar’dan ahz [ve] kabz edip meblağ-ı bâkī üç bin yüz elli akçesini dahi mezbûr İsar’dan da‘vâ ve taleb eylediğimde meblağ-ı bâkī-i mezbûra mezbûr Tatos emr [ve] kabûlü hâviye kefâlet-i sahîha-i şer‘iyye ile kefîl olmağın suâl olunup alıverilmesi matlûbumdur dedikde gıbbe’s-suâl ve’l-inkâr müdde‘î-i mezbûrdan müdde‘âsını mübeyyine beyyine taleb olundukda ityân-ı beyyineden izhâr-ı acz ile istihlâf etmeğin müdde‘î Mehmed Çavuş’un gāib-i mezbûr İsar zimmetinde cihet-i karz-ı şer‘îden hakkı olan üç bin yüz elli akçeye emr [ve] kabûlü hâviye kefâlet-i sahîha-i şer‘iyye ile kefîl olmadığına mezbûr Tatos’a yemîn teklîf olundukda ol dahi alâ vefki’l-mes’ûl yemîn billâhi’llezî enzele’l-İncîle alâ İsa -aleyhi’s-selâm- etmeğin mûcebince müdde‘î-i mezbûr Mehmed Çavuş bilâ-beyyine mu‘ârazadan men‘ olunmağın mâ vaka‘a bi’t-taleb ketb olundu. Fi’l-yevmi’r-râbi‘ aşer min Şevvâli’l-mükerrem li sene seb‘a ve seb‘în ve elf. Şuhûdü’l-hâl: Mehmed b. Abdullah, Şükrullah b. Mustafa, Mustafa b. el-Hâc Ahmed, Veli b. Mahmud.