Galata Mahkemesi 259 Numaralı Sicil (H. 1137-1138 / 1724-1725) cilt: 63, sayfa: 396 Hüküm no: 442 Orijinal metin no: [71a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Balıkcı Ayvaz v. Kirkor’un Çukadar Halil’den satın aldığı menzilde ikametine mani olunmaması El-emru hasbemâ yahvîhi nemakahu’l-fakīr ileyhi celle şânuhû el-Hâc Mustafa el-Kādî bi-medîneti Galata el-mahrûse -ufiye anhu-. Mahrûse-i Galata’da Sultan Bayezid mahallesinde sâkin işbu hâmilü’r-rakīm Balıkcı Ayvaz v. Kirkor nâm Ermeni mahfel-i şer‘-i hatîr-i lâzimü’t-tevkīrde mahelle-i merkūme ahâlîsinden İmâm Ali Efendi b. İbrahim ve es-Seyyid Mehmed Çelebi b. es-Seyyid Mehmed ve Hammâmî Ali Ağa b. Mustafa ve el-Hâc Ali b. Süleyman ve el-Hâc Osman b. Ali ve el-Hâc İbrahim b. Halil ve el-Hâc Ömer b. Mehmed ve İbrahim Çelebi b. Mehmed ve Süleyman Çelebi b. Ahmed ve Mehmed Çelebi b. Ahmed ve Süleyman Çelebi b. Mustafa ve Hüseyin Çelebi b. el-Hâc Ömer ve Ömer Bey b. Abdullah nâm kimesneler vesâirleri mahzarlarında üzerlerine tasvîr-i müdde‘â edip mahalle-i merkūmede vâki‘ bir tarafdan Mühtedi İbrahim menzili ve iki tarafdan Karakaş ve Aleksan nâm zimmîler menzilleri ve bir tarafdan tarîk-i âm ile mahdûd mülk menzil arsasının mukaddemâ mâliki olan Çukadâr Halil nâm kimesne civârında olanların ekser kefere menzilleri olup ve mahalle-i merkūme mescid-i şerîfinden ba‘îd ve Ermeni Kenîsesi’ne karîb olmağla arsa-i merkūme üzerine Müslimân menzili binâ ve içinde Müslim sâkin olmak bir vechile mümkün olmamağın merkūm Çukadâr Halil dahi arsa-i merkūmeyi bana be‘y ve tarafımdan vekâleten arsa-i merkūme üzerine mâlım ile benim için bir menzil binâ edivermekle hâlâ ben menzil-i merkūmda sâkin olmak murâd eylediğimde eşhâs-ı mezbûre menzil-i mezbûrun arsası mukaddemâ Müslim menzili arsası idi deyü yedimde olan fetvâ-yı şerîfe ve musahhah fermân-ı âlîye mugāyir beni menzil-i mezbûrda sâkin olmadan men‘ ederler deyü da‘vâ ve hâlâ mesned-nişîn-i sadr-ı fetvâ ve serîr-ârâ-yı dîvân fazl ve takvâ olan şeyhülislâm-ı sellemehü’l-meliki’s-selâm hazretlerinin ünvân-ı şerîfleriyle mu‘anven takrîr-i meşrûhuna mutâbıka bir kıt‘a fetvâ-yı şerîfe ile bir kıt‘a musahhah fermân-ı âlî ısdâr edicek evvelâ fetvâ-yı şerîfeye nazar oludukda Müslimîn ve kefere muhtalitan sâkin olan mahalle ahâlîsinden Zeyd-i Müslim mahalle-i mezbûrede vâki‘ mülk menzil arsasını Amr zimmîye bey‘ edip Amr dahi arsada menzil binâ edip süknâ murâd etdikde ba‘zı kimesneler ol menzilin arsası mukaddemâ Müslim menzili arsası idi deyü Amr’ı men‘a kādirler olurlarmı el-cevâb olmazlar deyü tasrîh olunup ve sâniyen fermân-ı âlîye nazar olundukda Galata’da Sultan Bayezid mahallesinde kal‘a dibinde vâki‘ Ayvaz Zimmî’nin sâkin olduğu mahallde ba‘zı kimesneler merkūmu ta‘cîz için ihrâc murâd edip lâkin menzil ehl-i İslâm sâkin olmak bir vechile mümkün olmayıp civârında olanların ekserî zimmî menzilleri olmağla merkūm Ayvaz derûnunda kemâ-kân sâkin olup ihrâc için ta‘cîz ve rencîde etdirmeyip âhara dahi sirâyet eylememek üzere mücerred merkūm Ayvaz hâne-i merkūmede ikāmet olunmasına mümâna‘at etdirilmeyip bu âna dek bir tarîkiyle ihrâc dahi olunmuş ise getürdüp iskân ettirdip hilâf-ı fermân-ı âlî bî-vech te‘addî etdirilmeye deyü buyurulup ve eşhâs-ı mezbûreden her biri dahi fetvâ-yı şerîfe ile mazmûn-ı fermân-ı âlîyi ikrâr ve i‘tirâf etmeğin ber-mûceb-i fetvâ-yı şerîfe ve fermân-ı âlî merkūm Ayvaz’ın menzil-i merkūmda sâkin olmasına mümâna‘at eylememek üzere eşhâs-ı mezbûreye tenbîh birle mâ-vaka‘a bi’l-ibtiğā ketb olundu. Fi’l-yevmi’s-sânî ve’l-ışrîn min-Cemâziyelâhir sene 1137. Şuhûdü’l-hâl: Mustafa Efendi b. Hasan, Süleyman Efendi b. Osman, Mehmed Efendi b. Ali, Bursalı Mehmed.