Galata Mahkemesi 259 Numaralı Sicil (H. 1137-1138 / 1724-1725) cilt: 63, sayfa: 397 Hüküm no: 443 Orijinal metin no: [71a-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Fransız tercümanlarından Bero’nun çocuk ve yakınları için satın aldıkları şarapların ithaline izin verilmesi İftihârü’l-ümerâ ve’l-ekâbir müstecmi‘u cemî‘i’l-me‘âlî ve’l-mefâhir el-muhtassu bi-mezîdi inâyeti’l-meliki’l-kādir dergâh-ı mu‘allâm yeniçerileri ağası ( ) ağa -dâme ulüvvuhû- ve kıdvetü’l-emâcid ve’l-ekârim câmi‘u’l-mehâmid ve’l-mekârim el-muhtassu bi-mezîdi inâyeti’l-meliki’d-dâim Hâssa bostancıbaşı ( ) -dâme mecduhû- tevkī‘-i refî‘i hümâyûn vâsıl olıcak ma‘lûm ola ki France pâdişâhının Âstâne-i sa‘âdetde mukīm olan elçisi kıdvetü’l-ümerâi’l-milleti’l-mesîhiyye Marki De Bonak -hutimet avâkibuhû bi’l-hayr- südde-i sa‘âdetime arzuhâl gönderip France beyzâdeliğine nisbeti olan Bero nâm tercümânın oğulları İstefan ve Cozep’in vesâir müte‘allikât ve ıyâlinin kifâf-ı nefsleriʼçün senede iki bin müdre hamra emr-i şerîf verilegelmeğle işbu bin yüz otuz altı senesinde dahi beher müdresi onar vakiyye olmak üzere İstanbul’a karîb iskele ve yalılardan akçeleriyle iştirâ eyledikleri iki bin müdre hamrın Galata’da hânelerine nakline mümâna‘at olunmayıp zâbitlerden ve âhardan harc ve avâid nâmiylı akçe mutâlebesiyle rencîde ve remîde etdirilmemek bâbında hükm-i hümâyûnum ricâ ve Dîvân-ı hümâyûnumda mahfûz olan kuyûd ahkâmına mürâca‘at olundukda vech-i muharrer üzere emr-i şerîfim verile geldiği mastûr ve mukayyed bulunmağın mukaddemâ verile gelen emr-i şerif mûcebince nakline mümâna‘at olunmamak bâbında fermân-ı âlîşânım sâdır olmuşdur vusûl buldukda bu bâbda sâdır olan fermân-ı celîlü’l-kadrim amel dahi vech-i meşrûh üzere sene-i mezbûrede beher müdresi onar vakiyye olmak üzere İstanbul’a karîb iskele ve yalılardan akçeleriyle iştirâ eyledikleri iki bin müdre hamrın Galata’da hânelerine nakline kimesneyi mümâna‘at etdürmeyip ve Galata voyvodası ve ümenâ ve zâbitler tarafından min-ba‘d gümrük ve bâc ve harc ve avâyid nâmıyla vesâir bahâne ile akçe mutâlebesiyle rencîde ve remîde etdürmeyesiz ammâ mukayyed olasız ki mikdâr-ı mu‘ayyeneden ziyâde ve senede iki def‘a alınmak ihtimâli olmaya şöyle bilesiz alâmet-i şerîfe i‘timâd kılasız, Tahrîren fî-evâil-i Zilhicce sene 1137. Be-makām-ı Kostantıniyyeti’l-mahrûse.