Galata Mahkemesi 259 Numaralı Sicil (H. 1137-1138 / 1724-1725) cilt: 63, sayfa: 398 Hüküm no: 444 Orijinal metin no: [71b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Fransız tercümanlarından Bero’nun çocuk ve yakınları için satın aldıkları şarapları ithal ettikleri Mahrûse-i Galata hâricinde Dörtyolağzı kurbundan sâkin France beyzâdelerine nisbeti olan Pero nâm tercümânın oğulları İstafan ve Cozeb nâm müste’menler taraflarından ikrâr-ı câi’z-zikre sâbitü’l-vekâle vekîlleri tercümân Franko v. Forenti mahfil-i şer‘de hâlâ Astâne-i sa‘âdetde bi’l-fi‘il yeniçeri ağası olan umdetü’l-emâcid ve’l-ekârim câmi‘u’l-mehâmid ve’l-mekârim izzetlü Hasan Ağa tarafından husûs-ı âti’l-beyâna mübâşir ta‘yîn olunan Çukadâr Mehmed Beşe b. Abdullah ve südde-i seniyyede bi’l-fi‘il bostâncıbaşı olan kıdvetü’l-havâs ve’l-mukarrabîn mu‘temedü’l-mulûk ve’s-selâtîn izzetlü İbrahim Ağa tarafından kezâlik mübâşir ta‘yîn olan Mustafa Haseki b. Mehmed mahzarında bi’l-vekâle ikrâr ve takrîr-i kelâm edip ağayân-ı müşârun-ileyhimâ hazerâtına hitâben sâdır olan işbu bir kıt‘a fermân-ı âlîşânda müvekkilân-ı merkūmân İstafan ve Cozep kendilerin ve müte‘allikâtlarının kifâf-ı nefsleriʼçün mu‘tâd üzere İstanbul’a karîb iskele ve yalılardan bin yüz otuz altı senesine mahsûben akçeleriyle iştirâ eyledikleri beher müdresi onar vakiyye olmak üzere iki bin müdre hamrlarını bu tarafda mahzenlerine nakl eylediklerinde ağayân-ı müşârun-ileyhimâ vesâir ümenâ ve ehl-i örf taraflarından harc ve resm ve avâyid ve tekâlîf-i sâire talebiyle bir ferd dahl u ta‘arruz eylemeye deyü mastûr ve mukayyed olmağın müvekkillerim merkūmân İstafan ve Cozeb dahi ber-mûceb-i fermân-ı âlî sene-i merkūmeye mahsûben iştirâ eyledikleri iki bin müdre hamrlarını bu tarafda mahzenlerine nakl ve vaz‘ eylediklerinde ağayân-ı müşârun-ileyhimâ vesâir ümenâ ve ehl-i örf taraflarından harc ve resm ve avâyid ve tekâlîf-i sâire talebiyle bir ferd dahl u ta‘arruz eylememişdir dedikde gıbbe’t-tasdîki’ş-şer‘î mâ-hüve’l-vâkı‘ bi’l-ibtigā ketb olundu. Fi’l-yevmi’l-hâmis min-Recebi’l-ferd sene 1137. Şuhûdü’l-hâl: Ahmed Efendi b. Süleyman, Süleyman Efendi b. Osman, Serbölük İbrahim Çelebi, Serbölük Halil Çelebi, İbrahim b. Mustafa, Ali b. Ahmed, Mehmed b. Ahmed.