Galata Mahkemesi 259 Numaralı Sicil (H. 1137-1138 / 1724-1725) cilt: 63, sayfa: 399 Hüküm no: 447 Orijinal metin no: [72a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Süleyman’ın talebi üzerine Fındıklı sakinlerinden Abdullah’ın davadan men edildiği Şer‘le görüle deyü buyuruldu. Devletlü ve merhametlü sultânım hazretleri sağ olsun bu kulunuzdan mîras iddi‘â eden Fındıklı sâkinlerinden Abdi nâm kimesne sekiz aydır sefînem bağladıp bende derecede müsâviyim deyü iddi‘â-i mücerred kat‘an mîrâsında alâkası olmadığına yedimde müte‘addid i‘lâm ve senedâtlarım var iken ve hâlâ bundan iki yüz mikdârı …? tevâtüren vâris kulunuz olup mezbûrun verâsetinde alâkası olmadığını babalar mahz olup ve hâlâ akçe ile üç nefer yalan şâhidi peydâ edip derecede müsâviyim deyü istimâ‘ etdirdip lillâhi ve li-resûlihî pâdişâh başı için fazîletli sadr-ı Rum efendi hazretleri kulunuz ben tevâtüren şâhidlerim istimâ‘ etdirüp fermân efendim Allâh aşkına olsun merhamet olunup tevâtüren şâhidlerim istimâ‘ eylemesi için tasrîhan ve sahîh fermân-ı âlîşânınız niyâz olunur bâkī fermân. Bende Süleyman. İ‘lamı mûcebince amel oluna deyü buyuruldu. Ma‘rûz-ı dâ‘î-i Devlet-i aliyyeleridir ki Arzuhâl eden Süleyman derûn-ı arzuhâlde mastûrü’l-ism Abdullah’dan mezbûr Abdullah bundan akdem vefât eden Osman’ın babası Abdülehad ile benim babam Durmuş’un babası Hüseyin li-ebeveyn karındaşları olup babaları ismi Debbâğ Ömer ve dedeleri ismi Abdülcemil anaları ismi Fâtıma ve maskat-ı re’sleri Gölpazarı kazâsının Gözpınarı karyesidir usûbet cihetinden verâseti bana münhasıradır deyü müteveffâ-yı mezbûrun terekesine vaz‘-ı yedine binâen da‘vâ eyledikde ben dahi müteveffâ-yı mezbûr Osman’ın babası Abdülhamid olup mezbûr Abdülhamid ile benim babam Giray li-ebeveyn karındaşlar olup babaları ismi Debbâğ Ramazan dedeleri ismi Abdullah anaları ismi Hadice ve maskat-ı re’sleri zikr olunan karyedir usûbet cihetinden verâseti bana münhasıradır benden gayri vârisi <> ve terekesine âhar müstehak yokdur deyü müdde‘î-i mezbûrdan ber-vech-i mukaddem verâseti da‘vâ ve vech-i mübeyyen üzere müdde‘âsı Mehmed b. Şa‘ban ve Ali Çelebi b. el-Hâc Receb şehâdetleriyle ba‘de’l-isbât şâhidîn-i mezbûrîn ba‘de’t-ta‘dîl ve’t-tezkiye şehâdetleri makbûle olmağın mûcebiyle mezbûr Süleyman’ın mezbûr Osman’a merkūm Abdullah’dan ber-vech-i mukaddem verâsetine hükm olunup müteveffâ-yı mezbûr Abdullah bî-vech mu‘ârazadan men‘ olunduğu huzûr-ı âlîlerine i‘lâm olundu. Fî 22 min-Şa‘bâni’l-mu‘azzam sene 1137.