Galata Mahkemesi 259 Numaralı Sicil (H. 1137-1138 / 1724-1725) cilt: 63, sayfa: 401 Hüküm no: 450 Orijinal metin no: [72b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Habsburg imparatorunun kapıkethüdasının şarap ithaline mani olunmaması İftihârü’l-ümerâ ve’l-ekâbir müstecmi‘u cemî‘i’l-me‘âlî ve’l-mefâhir el-muhtassu bi-mezîdi inâyeti’l-meliki’l-kādir Dergâh-ı mu‘allâm yeniçerileri ağası olan ( ) ağa -dâme izzuhû- ve iftihârü’l-emâcid ve’l-ekârim câmi‘u’l-mehâmid ve’l-mekârim el-muhtassu bi-mezîdi inâyeti’l-meliki’d-dâim Hâssa bostancıbaşı olan ( ) ağa -dâme mecduhû- tevkī‘-i refî‘i hümâyûn vâsıl olıcak ma‘lûm ola ki kıdvetü a‘yâni milleti’l-mesîhiyye Roma imparatoru tarafından Asitâne-i sa‘âdetde mukīm kapu kethudâsı Dedir Lanka-hutimet avâkibuhû bi’l-hayr- südde-i sa‘âdetime arzuhâl edip senede yedi bin müdre hamra emr-i şerîf verilegelmeğle 1135 senesinde dahi beher müdresi onar vakiyye olmak üzere İstanbul’a karîb iskele ve yalılardan ve Adalar’dan bir def‘a akçesiyle iştirâ eylediği yedi bin müdre hamrın hânesine nakline mümâna‘at olunmayıp ve Galata voyvodası ve ümenâ ve zâbitler tarafından min-ba‘d gümrük ve bâc ve avâyid ve harc nâmıyla akçe mütâlebesiyle vesâir bahâne ile dahl u rencîde olunmamak bâbında emr-i şerîfim ricâ etmeğin Dîvân-ı hümâyûnumda mahfûz olan kuyûd-ı ahkâma mürâca‘at olundukda 1134 senesinde vech-i meşrûh [üzere] emr-i şerîfim verildiği mastûr ve mukayyed bulunmağın mukaddemâ verilen emr-i şerîfim mûcebince minvâl-i meşrûh üzere bir def‘a nakline mümâna‘at olunmamak bâbında fermân-ı alîşânım sâdır olmuşdur buyurdum ki vusûl buldukda bu bâbda sâdır olan fermân-ı celîlü’l-kadrim mûcebince amel edip dahi vech-i meşrûh üzere sene-i mezbûrede beher müdresi onar vakiyye olmak üzere İstanbul’a karîb iskele ve yalı ve Adalar’dan akçesiyle iştirâ eylediği yedi bin müdre hamrın Galata’da vâki‘ hânesine nakline mümâna‘at olunmayıp ve Galata voyvodası ve ümenâ ve zâbitler tarafından min-ba‘d gümrük ve bâc ve avâyid ve harc nâmıyla akçe mutâlebesiyle vesâir bahâne ile bir ferde rencîde ve remîde etdürmeyesiz şöyle bilesiz ammâ mukayyed olasız ki mikdâr-ı mu‘ayyeneden ziyâde ve mükerrer olmak ihtimâli olmaya şöyle bilesiz alâmet-i şerîfe i‘timâd kılasız. Tahrîren evâhir-i Saferi’l-hayr sene 1136. Be-makām-ı Kostantıniyyeti’l-mahrûse.