Galata Mahkemesi 259 Numaralı Sicil (H. 1137-1138 / 1724-1725) cilt: 63, sayfa: 402 Hüküm no: 451 Orijinal metin no: [72b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Habsburg imparatorunun kapıkethüdasının içki ithaline mani olunmaması İftihârü’l-ümerâ ve’l-ekâbir müstecmi‘u cemî‘i’l-me‘âlî ve’l-mefâhir el-muhtassu bi-mezîdi inâyeti’l-meliki’l-kādir dergâh-ı mu‘allâm yeniçerileri ağası olan ( ) ağa -dâme izzuhû- ve iftihârü’l-emâcid ve’l-ekârim câmi‘u’l-mehâmid ve’l-mekârim el-muhtassu bi-mezîdi inâyeti’l-meliki’d-dâim Hâssa bostancıbaşı ( ) -dâme mecduhû- tevkī‘-i refî‘i hümâyûn vâsıl olıcak ma‘lûm ola ki kıdvetü a‘yâni’l-milleti’l-mesîhiyye Roma imparatoru tarafından Asitâne-i sa‘âdetde mukīm kapukethudâsı Dedir Lanka -hutimet avâkibuhû bi’l-hayr- südde-i sa‘âdetime arzuhâl gönderip mûmâ-ileyh senede bir def‘a yedi bin müdre hamra emr-i şerîf verilegelmeğle bin yüz otuz altı senesine mahsûb olmak üzere beher müdresi onar vakiyye olmak üzere İstanbul’a karîb yalı ve iskele ve adalardan birer def‘a akçesiyle iştirâ eylediği yedi bin müdre hamrın Galata’da hânesine nakline mümâna‘at olunmayıp ve Galata voyvodası ve ümenâ ve zâbitler tarafından min ba‘d bâc ve gümrük ve avâyid ve harc nâmıyla vesâir bahâne ile akçe mütâlebesiyle dahl u rencîde olunmamak bâbında emr-i şerîfim ricâ etmeğin Dîvân-ı hümâyûnumda mahfûz olan kuyûd-ı ahkâma mürâca‘at olundukda vech-i meşrûh üzere bin yüz otuz beş senesiʼçün emr-i şerîfim verildiği mastûr ve mukayyed bulunmağın mukaddemâ verilen emr-i şerîfim mûcebince minvâl-i meşrûh üzere bir def‘a nakline mümâna‘at olunmamak bâbında fermân-ı alîşânım sâdır olmuşdur buyurdum ki vusûl buldukda bu bâbda sâdır olan fermân-ı celîlü’l-kadrim mûcebince amel edip dahi vech-i meşrûh üzere kapukethudâsı mûmâ-ileyh sene-i mezbûre mahsûb beher müdresi onar vakiyye olmak üzere İstanbul’a karîb iskele ve yalı ve adalardan bir def‘a akçesiyle iştirâ eylediği yedi bin müdre hamrın hânesine nakline mümâna‘at olunmayıp ve Galata voyvodası ve ümenâ ve zâbitler tarafından min-ba‘d gümrük ve bâc ve avâyid ve harc nâmıyla vesâir bahâne ile akçe mutâlebesiyle rencîde ve remîde etdürmeyesiz ammâ mukayyed olasız ki bir takrîb ile mikdâr-ı mu‘ayyeneden ziyâde ve mükerrer nakl olunmak ihtimâli olmaya şöyle bilesiz alâmet-i şerîfe i‘timâd kılasız. Fî-evâhir-i Saferi’l-hayr sene 1137. Be-makām-ı Kostantıniyyeti’l-mahrûse.