Galata Mahkemesi 259 Numaralı Sicil (H. 1137-1138 / 1724-1725) cilt: 63, sayfa: 403 Hüküm no: 452 Orijinal metin no: [72b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Habsburg imparatorunun kapıkethüdasının satın aldığı içkiyi ithal ettiği Nemçe cesârının Astâne-i sa‘âdetde mukīm kapukethudâsı olup mahrûse-i Galata hâricinde Dörtyolağzı kurbünde mütemekkin dört sene zarfında ikrâr-ı âti’z-zikre sâbitü’l-vekâle vekîli olan Tercümân Corci v. Fransizko meclis-i şer‘de hâlâ Astâne-i sa‘âdetde bi’l-fi‘il yeniçeri ağası olan umdetü’l-emâcid ve’l-ekârim câmi‘u’l-mehâmid ve’l-mekârim izzetlü Hasan Ağa tarafından husûs-ı âti’z-zikre mübâşir ta‘yîn olunan Çukadâr Mehmed Beşe b. Abdullah ve südde-i seniyyede bostâncı başı olan iftihârü’l-havâs ve’l-mukarrabîn mu‘temedü’l-mülûk ve’s-selâtîn İbrahim Ağa tarafından kezâlik husûs-ı âti’z-zikre mübâşir ta‘yîn olunan Mehmed Haseki b. Abdullah mahzarlarında ikrâr ve takrîr-i kelâm edip ağayân-ı müşârun-ileyhimâya hitâben sâdır olan işbu iki kıt‘a fermân-ı şerîf-i âlîşân nâtık oldugu üzere müvekkilim merkūm Dedir Lanka ve âdemlerinin kifâf-ı nefsleriʼçün 1135 senesinde ve 1136 senesine mahsûb olup beher müdresi on bir vakiyye olmak üzere İstanbul’a karîb iskele ve yalı ve Adalar’dan akçesiyle iştirâ ve menziline nakline ruhsat verilen yedişer bin müdreden cem‘an on dört bin müdre hamrın müvekkilim merkūm Dedir Lanka ber mûceb-i fermân-ı âlîşân def‘a-i vâhide de Galata’da vâki‘ menziline nakl ve îsâl eyledikde ağayân-ı müşârun-ileyhimâ vesâir ümenâ ve ehl-i urûf taraflarından harc ve avâyid ve resm ve tekâlîf-i sâire talebiyle bir ferd dahl u ta‘arruz eylememişdir dedikde gıbbe’t-tasdîki’ş-şer‘î mâ-hüve’l-vâkı‘ ketb olundu. Fi’l-yevmi’s-sânî ve’l-ışrîn min-Şa‘bâni’l-mu‘azzam sene 1138. Şuhûdü’l-hâl: İbrahim b. Muharrem, Mustafa b. Mustafa, Mustafa b. Ahmed, İbrahim b. Mustafa, Mehmed b. Ahmed, Mustafa b. Receb.