Galata Mahkemesi 259 Numaralı Sicil (H. 1137-1138 / 1724-1725) cilt: 63, sayfa: 403 Hüküm no: 453 Orijinal metin no: [73a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Fransız tüccarların Edirne’den satın alıp İstanbul’a oradan da Fransa’ya gönderdikleri derilerden resm alınmaması Akzā kuzāti’l-Müslimîn evlâ vülâti’l-muvahhidîn ma‘deni’l-fazl ve’l-yakīn vârisü ulûmi’l-enbiyâi ve’l-mürselîn el-muhtassu bi-mezîdi inâyeti’l-meliki’l-mu‘în İstanbul kādısı -zîdet fezâiluhû- tevkī‘-i refî‘-i hümâyûn vâsıl olıcak ma‘lûm ola ki France pâdişâhının Âsitâne-i sa‘âdetimde mukīm olan elçisi kıdvetü ümerâi’l-milleti’l-mesîhiyye Rifonte Dandrazi -hutimet avâkibuhû bi’l-hayr- südde-i sa‘âdetime arzuhâl gönderip France tâcirleri memâlik-i mahrûseme getürdükleri emti‘alarının ahidnâme-i hümâyûn mûcebince yüzde üç gümrüklerin verip ve sefîneleri dahi üç yüz akçe selâmetlik resmin edâda kusûrları olmayıp hilâf-ı ahidnâme-i hümâyûn ziyâde nesne mütâlebesiyle rencîde olunmak îcâb etmez iken hâlâ France tâcirlerinin Edirne etrâfından akçeleriyle iştirâ edip arabalar ile Tekfurdağı’na ve ondan dahi kayıklar ile İstanbul’a getirip sefînelere vaz‘ ve France’ye irsâl murâd eyledikleri cild-i câmûs ve bakarlarından kadîmden resm alınmayıp ve resm mutâlebesiyle müdâhale ve rencîde olunmamak üzere mukaddemâ emr-i şerîfimle men‘ u def‘ olunmuş iken hâlâ İstanbul tuz emîni ( ) olan ( ) nâm kimesneler beher cildinden ikişer akçe resm mutâlebesiyle France tâcirlerinin cildlerin alıkoyup hilâf-ı ahdnâme-i hümâyûn ve mugāyir-i emr-i şerîf te‘addiyâtdan hâlî olmadığın bildirip emîn-i mezbûrun Francelinin cild-i gāvlarından resm mutâlebesiyle vâki‘ olan te‘addîsini men‘-i ekîd ile men‘ u def‘ olunmak bâbında emr-i şerîfim ricâ ve dîvân-ı hümâyûnumda mahfûz olan kuyûd-ı ahkâma mürâca‘at olundukda France tüccârı getürdükleri ve alıp götürdükleri emti‘alarından yüzde üç gümrük verip ziyâde taleb olunmaya ve hâris olan kasabaya ve reft ve bâc ve yasak kavli ve üç yüz akçeden ziyâde selâmetlik resmi taleb olunmaya deyü mastûr olmağın memlahası emîninin şart-ı iltizâmı mahallinde dahi İstanbul’a etrâf ve eknâfdan gelen tuzlu cild-i gāvın her birinden tuzlarıʼçün birer akçe resm-i mîrî alınmayıp veyâhud tuzları silkinip bir vechile inâd ve muhâlefet etdirilmemek üzere mukayyed olup bu sûretde France tüccârının kadîmden resm alınmayan metâ‘larından ol vechile rencîde olanları ahidnâme-i hümâyûna mugāyir olmağla ahidnâme-i hümâyûna mugāyir ta‘cîz etdirilmeyip ve alıkonulan cild-i câmûsları geri redd olunmak için sâbıkā başdefterdâr i‘lâmı mûcebince emr-i şerîfim sâdır olduğu mastûr ve mukayyed bulunmağın mukaddemâ sâdır olan emr-i şerîfime mugāyir te‘addîsi men‘ u def‘ olunmak bâbında fermân-ı âlîşânım sâdır olmuşdur buyurdum ki vusûl buldukda bu bâbda sâdır olan fermân-ı celîlü’l-kadrim mûcebince amel dahi vech-i meşrûh üzere hilâf-ı ahdnâme-i hümâyûn ve mugāyir-i emr-i şerîf France tüccârlarının cild-i câmûslarından resm mütâlebesiyle tuz emîn-i mezkûru te‘addî ve rencîde etdirmeyip men‘-i ekîd ile men‘ u def‘ eyleyip mazmûn-ı emr-i şerîfimle âmil olasın şöyle bilesin alâmet-i şerîfime i‘timâd kılasın. Tahrîren fî-evâil-i şehr-i Ramazâni’l-mübârek sene [1]137, Be-makām-ı Kostantıniyyeti’l-mahrûse.