Galata Mahkemesi 259 Numaralı Sicil (H. 1137-1138 / 1724-1725) cilt: 63, sayfa: 404 Hüküm no: 454 Orijinal metin no: [73a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Usulsüz iflasların önlenmesi için tedbir alınması Sahh Galata kādısı fazîlietlü efendi Ba‘zı kimesne bey‘ u şirâ ve istidâne ve istikrâz tarîkiyle üzerlerine edâsı lâzım [geleni] edâda te‘allül ve te‘azzür edip izn-i şer‘le vaz‘-ı zindân ve habs ve tazyîk olunduklarında mücerred kendülerin tahlîs kasdıyla hîleye sülûk ve iki nefer mechûlü’l-adâle şâhid ikāmeti ile iflâsını isbât ve yedlerine taraf-ı şer‘îden i‘lâm veyâhud hüccet alıp bu vesîle ile ibtâl-i hukūk etmek Yehûd ve Nasâra ve sarrâf tâifesinin âdet-i müstemirreleri olmağla nice mütemevvil tüccârın fi’l-hakīka iflâsına sebeb oldukları şuyû‘undan gayri bu husûsda kemâl-i tahrîr ve ihtimâm elzem ve beyyinesi evlâ ve ercah ve hukūk-ı ibâdı ibtâl ve izā‘atdân sıyânet için iflâs-ı şehâdetde fukahâ-i izâm ve ulemâ-i kirâmın yazdıkları vech-i vecîh üzere şurûtuna dikkat ve ihtiyât ve zamâna göre şuhûda adem-i i‘timâddan nâşî iflâs beyyinesi ancak huzûrumuzda şer‘le istimâ‘ ve ba‘de’t-ta‘dîl ve’t-tezkiye hükm-i şer‘in hükmü oldukdan sonra mûcebini fermân-ı âlî sâdır oldukca da‘vâsının istimâ‘ı ve i‘lâm ve hücceti verilmeğin tevakkuf ve huzûrumuza havâle olunup bu mâddede zîr-i hükûmetinizde olan mahkemeler nüvvâbı efendileri men‘ ve vech-i meşrûh üzere olmasını dahi i‘lâm ve i‘lân eyleyesiz deyu. Fî 12 L sene [1]137.