Ahi Çelebi Mahkemesi 1 Numaralı Sicil (H. 1063-1064 / M. 1652-1653) cilt: 49, sayfa: 72 Hüküm no: 40 Orijinal metin no: [7a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Emrullah b. Abdi’nin, Mehmed Beşe’ye emanet verdiği para davasında aralarında sulh sağlandığı Yazıcı tâifesinden Emrullah b. Abdi nâm kimesne makām-ı kazâda işbu bâ‘isü’l-kitâb Mehmed Beşe b. Ca‘fer muvâcehesinde ikrâr ve takrîr-i kelâm edip bundan akdem mezbûr Mehmed Beşe’ye emânet vechi üzere altı bin akçe def‘ ve teslîm eylemişdim deyü da‘vâ eylemeğin mezbûr Mehmed Beşe dahi benim de senin zimmetinde mâl-ı şirketden beş bin yüz akçe hakkım vardır deyü da‘vâ edip beynimizde münâza‘ât-ı kesîre vâkı‘a olmağın el-hâletü hâzihî beynimize muslihûn tavassut edip meblağ-ı mezbûr altı bin akçeyi dört bin akçe üzerine beni sulh eylediklerinde ben dahi sulh-i mezbûru kabûl ve bedel-i sulh olan meblağ-ı mezbûru bi’t-tamam yedinden ahz u kabz edip ba‘de’l-yevm benim mezbûr Mehmed ve mezbûr Mehmed’in benim ile mâl-ı şirket ve gayra müte‘allik biri [birimiz] ile da‘vâ ve nizâ‘ımız kalmadı dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fi’l-yevmi’s-sâbi‘ min-Şa‘bâni’l-mu‘azzam li-sene selâse ve sittin ve elf. Şuhûdü’l-hâl: İmâmzâde Mehmed Efendi b. Rıdvan el-müezzin, es-Seyyid Mehmed Efendi el-Kādı, Hasan Çelebi [b.] Kanber er-Ressâm, Pîrî b. Hüseyin, Mehmed Beşe Çukadâr.