Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 814 Hüküm no: 1062 Orijinal metin no: [127a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Hasan Çelebi b. Himmet’in, evini Siyavuş Bey b. Abdullah’a sattığı Mahmiye-i İstanbul’da Çakır Ağa mahallesinde sâkin Hasan Çelebi b. Himmet nâm kimesne meclis-i şer‘-i şerîf-i lâzımü’t-teşrîfde işbu râfi‘ü’l-kitâb Siyavuş Bey b. Abdullah nâm kimesne mahzarında bi’t-tav‘i’s-sâf ikrâr ve takrîr-i kelâm edip akd-i âtî sudûruna değin yedimde mülk ve hakkım olup mahalle-i mezbûrda vâki‘ bir tarafdan Mehmed Çelebi b. Ali mülkü ve bir tarafdan mahalle-i mezbûre imâmına meşrûta olan vakf menzil ve bir tarafdan tarîk-i âm ile mahdûd iki bâb fevkānî oda ve bir bâb tahtânî oda [ve] zât-ı eşcâr-ı müsmire ve gayr-ı müsmire bahçe ve kenîfi müştemil menzilimi cümle tevâbi‘ ve levâhıkıyla merkūm Siyavuş Bey’e iki yüz yirmi esedî guruşu tarafeynden îcâb ve kabûlü hâvî bey‘-i bâtt-ı sahîh-i şer‘î ile bey‘ ve teslîm edip ol dahi vech-i muharrer üzre iştirâ ve tesellüm ettiğinden sonra semeni olan meblağ-ı merkūm iki yüz yirmi esedî guruşu merkūm Siyavuş Bey yedinden tamâmen ahz u kabz eyledim, ba‘de’l-yevm menzil-i mahdûd-ı mezbûr merkūm Siyavuş Bey’in mülk-i müşterâsıdır keyfe mâ yeşâ’ ve yahtâr mutasarrıf olsun dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Fi’l-yevmi’s-sânî ve’l-ışrîn min Şevvâli’l-mükerrem li sene seb‘a ve seb‘în ve elf Şuhûdü’l-hâl: Yahya Efendi b. Mehmed el-İmâm, Mehmed Halîfe b. Ali el-Müezzin, Hasan Beşe b. Mehmed, Mehmed Beşe b. Abdullah, İbrahim Ağa b. Ömer, Mustafa b. Mahmud, el-Hâc Mehmed.