Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 815 Hüküm no: 1063 Orijinal metin no: [127a-4] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. el-Hâc Hasan b. Abdullah’ın, ev eşyalarını karısı Ümmühani Hatun bt. Ali Efendi’ye hibe ettiği Husûs-ı âti’l-beyânın mahallinde tahrîri iltimâs olunmağın cânib-i şer‘den mevlânâ keşfî Mustafa Efendi irsâl olunup ol dahi mahmiye-i İstanbul’da el-Hâc Ferhad mahallesinde el-Hâc Hasan b. Abdullah’ın sâkin olduğu menzile varıp zeyl-i kitâbda muharrerü’l-esâmî olan müslimîn huzûrunda akd-i meclis-i şer‘-i şerîf eyledikde merkūm el-Hâc Hasan meclis-i ma‘kūd-ı mezbûrda zevce-i menkûhası olup zâtı mahalle-i mezbûre imâmı Mehmed Efendi b. İbrahim ve İsmail Çelebi b. Mehmed el-Müezzin şehâdetleri ile mu‘arrefe olan Ümmühâni Hâtun bt. Ali Efendi mahzarında ikrâr ve takrîr-i kelâm edip silk-i mülk-i sahîhimde münselik yirmi aded beledî yastık ve bir arka keçesi ve dört yan keçesi ve iki kebîr kaliçe ve elli aded sahan ve on aded tencere ve sekiz aded beledî döşek ve on altı aded beledî yorgan ve on aded keçemi zevcem merkūme Ümmühâni’ye hibe-i sahîha-i şer‘iyye ile hibe ve teslîm ol dahi meclis-i hibede ittihâb ve kabûl ve kabz ve tesellüm eyledi, ba‘de’l-yevm eşyâ-i mezkûre zevcem mezbûre Ümmühâni’nin emlâk-i mevhûbesidir keyfe mâ yeşâ’ ve yahtâr mutasarrıfe olsun dedikde gıbbe’t-tasdîk vâki‘ hâli mevlânâ-yı mezbûr mahallinde tahrîr ba‘dehû ma‘an irsâl olunan Mehmed b. Ramazan ile meclis-i şer‘a gelip alâ vukū‘ihî inhâ ve takrîr etmeğin mâ hüve’l-vâki‘ bi’t-taleb ketb olundu. Fi’l-yevmi’l-hâmis aşer min Şevvâli’l-mükerrem li sene seb‘a ve seb‘în ve elf. Şuhûdü’l-hâl: Fahrü’l-a‘yân Receb Ağa b. Şaban, Hasan Efendi b. Nasuh, eş-Şeyh Mehmed b. Mehmed, el-Hâc Ahmed b. el-Hâc Said, Ferhad Beşe [b.] Abdullah, Abdullah Çelebi b. Abdullah.