Galata Mahkemesi 580 Numaralı Sicil (H. 1221-1222 / M. 1806-1808) cilt: 84, sayfa: 80 Hüküm no: 4 Orijinal metin no: [1b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Zeynelâbidin Beşe’nin fuzuli zabt ettiği kahvehaneyi tahliye edip Mustafa Beşe’ye teslimine karar verildiği Mahrûse-i Galata’ya muzâfe nefs-i İstinye’de Çavuşbaşı [mahallesi] ahalisinden Mustafa Beşe b. Ahmed nâm kimesne mahrûse-i mezbûre Bâb Mahkemesi’nde meclis-i şer‘de derûn-ı arzuhâlde mezbûru’l-ism Zeynelâbidin Beşe b. İbrahim nâm kimesne muvâcehesinde es-Seyyid Mustafa b. es-Seyyid Halil hâzır olduğu hâlde mahâll-i mezbûrda kâin iki tarafından benim menzilim bahçesi ve kahve dükkânım ve bir tarafdan bakkāl mahzeni ve taraf-ı râbi‘i tarîk-i âm ile mahdûd mutasarrıf olduğum bir kıt‘a kahvehâne derûnunda mevcûde kahvehâne âlâtı tâ‘bir olunup hâmiş-i arzuhâlde mastûr der-kenâr nâtık olduğu üzere şürût-ı nizâma dâhil olmayıp aklâmda mukayyed olmayan âlâtdan eşyâ-i ma‘lûmeye mâlik olan hâzır-ı mezbûr es-Seyyid Mustafa’dan semen-i makbûza müşterâ, mezbûr Zeynelâbidin Beşe’nin yedimde mülkü[m] olmak hasebiyle kahvehâne-i merkūmede fuzûlî sâkin olup bana teslîmden imtinâ‘ etmekle suâl olunur kahvehâne-i merkūmeyi tahliye ve hâliyeten bana teslîme mezbûr Zeynelâbidin Beşe’ye tenbîh olunmak ma‘lûmumdur [matlûbumdur] deyü ba‘de’d-da‘vâ ve’s-suâl mezbûr Zeynelâbidin dahi cevâbında hâl bi’l-cümle bâlâda bast olunduğu minvâl üzere olduğunu tâyi‘an ikrâr u i‘tirâf etmeğin mûcebince kahvehâne-i merkūmeyi tahliye ve mutasarrıf-ı müdde‘î-i mezbûra hâliyeten teslîme mezbûr Zeynelâbidin Beşe’ye tenbîh olunduğu mübâşirleri Kapıkethüdâsı Kadri kulları yediyle huzûr-ı âlîlerine i‘lâm olundu. Fî 5 M sene [1]221.