Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 815 Hüküm no: 1064 Orijinal metin no: [127a-5] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mehmed Ağa b. Yakub’un, Mustafa Ağa b. İsa’daki alacağını Arslan oğlu İvaz yoluyla tahsil ettiğinin ispat edildiği Mahmiye-i İstanbul’da Kalenderhâne mahallesi ahâlîsinden Mehmed Ağa b. Yakub nâm kimesne meclis-i şer‘-i şerîf-i Ahmedî ve mahfil-i dîn-i münîf-i Muhammedî’de râfi‘ü’l-kitâb Mustafa Ağa b. İsa nâm kimesne mahzarında üzerine da‘vâ ve takrîr-i kelâm edip vilâyet-i Anadolu’da medîne-i Kütahya’ya tâbi‘ Sekiköyü nâm karyenin kavm-i mahsûr olan ahâlîsi zimmetlerinde deyn-i şer‘îden hakkım olan yüz kırk beş esedî guruşu ahâlî-i mezbûrdan ahz [ve] kabza tarafımdan mezbûr Mustafa Ağa[’yı] mukaddemâ vekîl edip ol dahi ba‘de’l-kabûl meblağ-ı mezbûru [127b] ahâlî-i karye-i mezbûreden ahz u kabz etmişidi suâl olunup meblağ-ı mezbûru bana teslîme tenbîh olunmak matlûbumdur dedikde gıbbe’s-suâl mezbûr Mustafa Ağa cevâbında meblağ-ı mezbûru ahâlî-i mezbûreden vech-i mübeyyen üzre ahz u kabz ettiğimden sonra mezbûr Mustafa Ağa meblağ-ı mezbûru Arslan oğlu İvaz nâm zimmîye teslîm eyle deyû bana emr etmekle ben dahi meblağ-ı mezbûru tamâmen mezbûr İvaz zimmîye teslîm etmişidim deyû def‘le mukābele edicek gıbbe’s-suâl ve’l-inkâr mezbûr Mustafa Ağa’dan def‘-i mezbûrunu mübeyyine beyyine taleb olundukda mahmiye-i mezbûrdan Sancakdâr Hayreddin mahallesi sükkânından Ahmed Bey b. el-Hâc İsa ve Osman b. Hasan nâm kimesneler li ecli’ş-şehâde meclis-i şer‘a hâzırân olup istişhâd olunduklarında fi’l-hakīka müdde‘î-i mezbûr Mehmed Ağa vech-i muharrer üzre merkūm Mustafa Ağa yedinde olan yüz kırk beş esedî guruşunu mezbûr Arslan oğlu İvaz zimmîye teslîm eyle deyû mezbûr Mustafa Ağa’ya emr ettiğinden sonra mezbûr Mustafa Ağa dahi emri üzre meblağ-ı merkūm yüz kırk beş esedî guruşu tamâmen huzûrumuzda merkūm Arslan oğlu İvaz zimmîye teslîm edip mezbûr İvaz dahi vech-i muharrer üzre yedinden ahz u kabz etmişidi, biz bu husûsa bu vech üzre şâhidleriz şehâdet dahi ederiz deyû her biri edâ-i şehâdet-i şer‘iyye ettiklerinde ba‘de’t-ta‘dîl ve’t-tezkiyye şehâdetleri makbûle olmağın mûcebince müdde‘î-i mezbûr Mehmed Ağa vech-i mübeyyen üzre mu‘ârazadan men‘ olunup mâ hüve’l-vâki‘ bi’t-taleb ketb olundu. Fi’l-yevmi’l-ışrîn min Şevvâli’l-mükerrem li sene seb‘a ve seb‘în ve elf. Şuhûdü’l-hâl: Mustafa Ağa b. Muharrem, Hacı Selim b. Osman, çukadâr Hasan Beşe b. Abdullah, Hasan Çelebi b. Ahmed.