Galata Mahkemesi 580 Numaralı Sicil (H. 1221-1222 / M. 1806-1808) cilt: 84, sayfa: 86 Hüküm no: 20 Orijinal metin no: [2b-7] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Debbağ Mehmed Salih Ağa’nın küçük oğlu Ahmed’in iki aylık birikmiş nafaka ücretini boşandığı karısı Emine Hatun’a ödemesine karar verildiği Mahmiye-i İstanbul’da Zeyrek kurbünde Hızır Bey Mahallesi’nde sâkine Emine bt. Mehmed Emin nâm hatunun anası ve tarafından husûs-ı âti’z-zikrde vekîl olduğu ber-nehc-i şer‘î sâbit olan mu‘arrefetü’z-zât Fâtıma bt. Mustafa nâm hatun Galata Bâb Mahkemesi’nde meclis-i şer‘de damadı Debbâğ Mehmed Salih Ağa b. Ahmed nâm kimesne muvâcehesinde kızım müvekkile-i mezbûre Emine’nin damadım mezbûr Mehmed Salih Ağa ile zevciyyet beynlerinde kāime iken mezbûrun firâşından hâsıla ve kızım müvekkile-i mezbûreden mütevellid sagīr oğlu Ahmed hıdânesinde iken bâ-hüccet-i şer‘iyye beher şehr dokuz guruş nafaka-i mukaddere-i mefrûza-i müstedânesinde iki ayda zimmetinde müctemi‘ on sekiz guruş mezbûr Mehmed Ağa’dan bi’l-vekâle taleb ederim deyü ba‘de’d-da‘vâ ve’l-ikrâr mûcebince meblağ-ı mecmû‘-ı mezkûr on sekiz guruşu kızı müvekkile-i mezbûre için vekîli müdde‘iye-i mezbûre Fâtıma Hatun’a edâ ve teslîme mezbûr Mehmed Salih Ağa’ya tenbîh olunduğu bi’l-iltimâs huzûr-ı âlîlerine i‘lâm. Fî 12 M sene [1]221.