Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 816 Hüküm no: 1065 Orijinal metin no: [127b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Hüseyin Alaybeyi b. Ahmed’in evini Veli Paşa Vakfı’na istiğlâl yoluyla sattığı Mahmiye-i İstanbul’da Yedikule kurbunda Kürkçü el-Hâc Hüseyin mahallesinde sâkin Hüseyin Alaybeyi b. Ahmed meclis-i şer‘-i hatîrde merhûm Veli Paşa rûhu için İbrahim Paşa sarayı’nda kırâat olunan eczâ-i şerîfeye mevkūfe nukūda bi’l-fi‘l mütevellî olan bâ‘isü’l-kitâb Ali Efendi b. Hüseyin mahzarında ikrâr ve takrîr-i kelâm edip akd-i âtî sudûruna değin yedimde mülk ve hakkım olup mahalle-i mezbûrede vâki‘ bir tarafdan Belkıs Hâtun mülkü ve iki tarafdan Mustafa Efendi mülkü ve bir tarafdan tarîk-i âm ile mahdûd büyût-ı adîdeyi müştemil menzilimi cümle hukūk ve merâfıkı ile mütevellî-i merkūm Ali Efendi’ye yüz kıt‘a riyâlî kebîr guruşa bi tarîki’l-istiğlâl bey‘ ve teslîm edip ol dahi mâl-ı vakf-ı mezbûr ile vech-i muharrer üzre iştirâ ve tesellüm ve kabûl eyledikden sonra semeni olan meblağ-ı mezbûru vakf-ı mezbûra deynim olan yüz kıt‘a riyâlî kebîr guruşa takās mütevellî-i mezkûr dahi mukāssa ve kabûl edip mütevellî-i mezkûr Ali Efendi’ye menzil-i mahdûd-ı mezbûru gıbbe’t-tahliyyeti’ş-şer‘iyye târih-i kitâbdan üç yüz altmış gün tamâmına değin bana on beş guruşa îcâr ve teslîm edip ben dahi vech-i meşrûh üzre on beş riyâlî guruşa istîcâr ve kabûl eyledim dedikde gıbbe’t-tasdîk mâ hüve’l-vâki‘ bi’t-taleb ketb olundu. Fi’l-yevmi’l-hâdî ve’l-ışrîn min Şevvâli’l-mükerrem li sene seb‘a ve seb‘în ve elf Şuhûdü’l-hâl: Şaban Ağa b. Süleyman, İmâm Abdurrahman b. ( ), Mehmed Çelebi b. Mehmed, Hasan Çavuş b. Abdullah, Hasan Bey b. ( ) Kethüdâ-yı baltacıyân, Mehmed Odabaşı.