Galata Mahkemesi 580 Numaralı Sicil (H. 1221-1222 / M. 1806-1808) cilt: 84, sayfa: 88 Hüküm no: 24 Orijinal metin no: [3a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Bakkāl Petro v. Vasil’in vekili Bakkāl Yakomi v. Hıristo aleyhine açtığı alacak davasında sulh olduğu Küçük Ayasofya’da Bakkāl Petro v. Vasil Galata’da mahfil-i kazâda Bakkāl Yakomi v. Hıristo zimmî muvâcehesinde benim mahalle-i mezkûr ahâlîsinden ma‘lûmü’l-esâmî kimesneler zimmetlerinde bakkāl emti‘ası semenlerinden alacağım olan iki yüz elli iki guruşu mersûm Yakomi zimmî tarafından bi’l-vekâle cem‘ ve tahsîl ve ahz u kabz ve makbûzundan elli guruşu bana def‘ ü teslîm mâ‘adâ yedinde kalan iki yüz iki guruşu kendi umûruna sarfla istihlâk etmeğin meblağ-ı bâkī-i müstehlek-i merkūm iki yüz iki guruşu vekîlim mersûmdan tazmîn [murâd] ederim deyü tasaddî eylediğim da‘vâmdan bâ-vesâtet-i muslihîn mersûm Yakomi zimmî ile yüz guruşa sulh olup mâ‘adâ yüz iki guruşa müte‘allika mersûmun zimmetini ibrâ eyledim dedikde mersûm Yakomi zimmî dahi ber-vech-i muharrer sulh ve ibrâyı kabûl edip ibrâdan müstesnâ bedel-i sulh-ı merkūm yüz guruşu müdde‘î-i mersûma deyni olduğunu ikrâr u i‘tirâf etmeğin mûcebince bedel-i sulh-ı merkūm yüz guruşun müdde‘î-i mersûma Dimitri zimmîye edâsıyla mersûm Yakomi zimmî ilzâm olunduğu bi’l-iltimâs huzûr-ı âlîlerine i‘lâm olundu. Fî 16 M sene [1]221.