Galata Mahkemesi 580 Numaralı Sicil (H. 1221-1222 / M. 1806-1808) cilt: 84, sayfa: 88 Hüküm no: 25 Orijinal metin no: [3a-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Fâtıma bt. İbrahim’in mehir ve nafaka hususunda boşandığı kocası Topçu Mehmed Sâdık ile otuz guruşa sulh olduğu Kasaba-i Kasımpaşa’da Kara İmâm Mahallesi’nde sâkine ve zâtı mu‘arrefe Fâtıma bt. İbrahim nâm hatun Galata’da mahfil-i kazâda Topçu Mehmed Sâdık b. Abdullah nâm kimesne muvâcehesinde mezbûr Mehmed Sâdık zevc-i dâhilim olup târih-i i‘lâm günü beni tatlîk etmekle zimmetinde mütekarrir ve ma‘kūdun-aleyh mehr-i müeccelim olan elli bir guruş ve hîn-i akdde mehr-i mu‘accel tesmiye olunan yüz yirmi guruş ile nafaka-i iddet ve meûnet-i süknâm için bi’t-terâzî ta‘yîn olunan on guruş ki cem‘an yüz seksen bir guruşu hâlâ taleb ederim deyü tasaddî eylediğim da‘vâmdan bâ-tavassut-ı muslihîn mezbûr Mehmed Sâdık ile otuz guruşa ba‘de’s-sulh ve’l-kabûl bedel-i sulh-ı mezkûrdan mâ‘adâ yüz elli bir guruşa müte‘allika da‘vâdan mezbûr Mehmed Sâdık’ın zimmetini kabûlü hâvî ba‘de’l-ibrâ ibrâdan müstesnâ bedel-i sulh-ı merkūm otuz guruş mezbûrun zimmetinde kalmağla hâlâ taleb ederim deyü ba‘de’d-da‘vâ ve’l-ikrâr alâ-mûcibi ikrârihi bedel-i sulh-ı merkūm otuz guruşun müdde‘iye-i mezbûre Fâtıma Hatun’a edâsıyla mezbûr Mehmed Sâdık ilzâm olunduğu bi’l-iltimâs huzûr-ı âlîlerine i‘lâm olundu. Fî 18 M sene [1]220 [1221].