Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 817 Hüküm no: 1066 Orijinal metin no: [127b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Fâtıma bt. Lütfullah’ın süs eşyalarını hibe etmediğinin anlaşıldığı Mahmiye-i İstanbul’da Kürkçübaşı mahallesi sükkânından Havva bt. Ahmed nâm hâtunun zevci ve tarafından husûs-ı âti’l-beyâna vekîli olduğu Mesud Efendi b. Receb ve Sâlih Çelebi b. Abdülkerim nâm kimesneler şehâdetleriyle şer‘an sâbit olan Receb b. Mustafa nâm kimesne meclis-i şer‘-i şerîfde üvey kayınanası bâ‘isetü’l-kitâb Fâtıma bt. Lütfullah nâm hâtun mahzarında üzerine da‘vâ ve takrîr-i kelâm edip mezbûre Fâtıma yedinde olan işbu sîm bir ön kuşak ve bir çift inci küpesini bundan akdem yedinde mülkü olduğu hâlde zevci olup müvekkilemin babası olan mezbûr Ahmed’e hibe ve teslîm edip mezbûr Ahmed dahi ittihâb ve tesellüm ettiğinden sonra müvekkilem mezbûre Havva’ya teslîm edip mezbûre Havva dahi ittihâb ve tesellüm etmekle mülk-i mevhûbu oldukdan sonra mezbûre Fâtıma zikr olunan kuşak ve küpeyi müvekkilemin yedinden bi gayrı hakkın ahz u kabz etmişdir suâl olunup ihkāk-ı hak olunmak matlûbumdur dedikde, gıbbe’s-suâl mezbûre Fâtıma cevâbında zikr olunan küpe ve kuşağı mezbûre Havva’ya âriyet vermek için zevcim mezbûr Ahmed’e i‘âre ve teslîm etmişdim deyip hibe ettiğini inkâr edicek müdde‘î-i mezbûrdan müdde‘âsını mübeyyine beyyine taleb olundukda ityân-ı beyyineden izhâr-ı acz ile istihlâf etmeğin mezbûre Fâtıma’ya zikr olunan küpe ve kuşağı zevc-i mezbûr Ahmed Ağa’ya hibe ve teslîm etmediğine yemîn teklîf olundukda ol dahi alâ vefki’l-mes’ûl yemîn billâhi’l-aliyyi’l-a‘lâ etmeğin mûcebince müdde‘î-i mezbûr mu‘ârazadan men‘ olunmağın mâ hüve’l-vâki‘ bi’t-taleb ketb olundu. Fi’l-yevmi’l-ışrîn min Şevvâli’l-mükerrem li sene seb‘a ve seb‘în ve elf Şuhûdü’l-hâl: İbrahim Ağa b. Ali, İsmail b. Ali, Mustafa b. Halil, Hasan Beşe Çukadâr, Osman Çelebi b. Ebûbekir.