Galata Mahkemesi 580 Numaralı Sicil (H. 1221-1222 / M. 1806-1808) cilt: 84, sayfa: 97 Hüküm no: 41 Orijinal metin no: [4b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Top Ustası Mehmed’in kiraya verdiği atını sakatlayan Mihal v. Dimitri aleyhine açtığı tazminat davasında yüz on guruşa sulh olduğu Galata’ya muzâfe kasaba-i Tophane’de sâkin Dergâh-ı âlî topçularından yirmi altı cemâ‘atin top ustası Mehmed b. Mehmed Galata Bâb Mahkemesi’nde meclis-i şer‘de Mihal v. Dimitri zimmî muvâcehesinde mersûm Mihal zimmî târih-i i‘lâmdan iki gün mukaddem mâlik olduğum işbu mu‘âyene olunan bir re’s bârgirimi kasaba-i mezbûreden Arnavud karyesine gidip gelince irkâb için doksan para ücret ile istîcâr ve kabz eyledikden sonra zikrolunan bârgir ile râkiben karye-i mezbûreye gidip gelirken esnâ-i râhda tarlalar arasında mu‘tâddan ziyâde koşdurup te‘addîsinden nâşî tarlalar kenarında mevzû‘ bel üzerine uğradıp sapı zikrolunan bârgirin kasığına saplanıp mecrûh olmağla noksan kıymetini mersûm Mihal zimmîden taleb ederim deyü tasaddî eylediğim da‘vâmdan bâ-tavassut-ı muslihîn mersûm Mihal zimmî ile yüz on guruş bedel-i makbûza ba‘de’s-sulh ve’l-kabûl zikrolunan bârgire ve ziyâde kıymet mütâlebesine ve bi’l-cümle husûs-ı merkūma ve bedel-i sulh-ı mezkûra müte‘allika âmme-i de‘âvîden herbirimiz âharın zimmetini ibrâ ve iskāt ve herbirimiz ber-vech-i muharrer âharın ibrâsını kabûl ve bu vechile kat‘-ı nizâ‘ eyledik deyü ikrâr ve tasdîkleri tescîl [ve huzûr-ı âlîlerine i‘lâm olundu.]. Fî 29 M sene [1]221.