Galata Mahkemesi 580 Numaralı Sicil (H. 1221-1222 / M. 1806-1808) cilt: 84, sayfa: 99 Hüküm no: 47 Orijinal metin no: [4b-7] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Emine bt. Mehmed’in vurarak çocuğunu düşürmesine sebep olduğu iddiasıyla Emine bt. İbrahim aleyhine açtığı diyet davasında altmış guruşa sulh olduğu Mahrûse-i Galata’ya muzâfe kasaba-i Tophane’de Cihangir Mahallesi’nde sâkin olup husûs-ı âtîde kendi nefsinden asîl ve zevcesi Emine bt. Mehmed nâm hatun tarafından ber-vech-i câ’î vekîl olduğunu zâtını ârifân Sıvacı Ömer Beşe b. Mehmed ve Ali Beşe b. Hasan şehâdetleriyle sâbit olan sâhib-i arzuhâl Kalyoncu İbrahim Beşe b. Halil bi’t-terâzî Galata Mahkemesi’nde meclis-i şer‘-i münîrde hem-civârı olup derûn-ı arzuhâlde mezkûrü’l-ism diğer Emine bt. İbrahim’in zevci ve tarafından husûs-ı câ’îde vekîl-i müsecceli Sıvacı el-Hâc Abdurrahman b. Mustafa muvâcehesinde müvekkile-i merkūme diğer Emine Hatun târih-i i‘lâmdan on dokuz gün mukaddem Perşembe günü mahalle-i mezbûrede kâin sûkda zevce-i müvekkilem mezbûrenin beline sopa ile amden bi-gayr-ı hak darbedip on üç gün mürûrunda darb-ı mezkûrun tesîrinden nâşî beş aylık müstebînü’l-hilka bir cenîn-i hayy-i inâs ilkā edip veled-i merkūm ol ânda vefât etmekle mûcib-i şer‘îsi müvekkile-i mezbûre diğer Emine Hatun’dan bi’l-asâle ve bi’l-vekâle taleb ve da‘vâ sadedinde iken beynimize muslihûn tavassut edip beni da‘vâ-yı mezkûremden müvekkile-i mezbûre diğer Emine Hatun ile an-inkâr 60 guruş bedel-i makbûza sulh eylediklerinde ol dahi sulh-ı mezkûru ba‘de’l-kabûl darb-ı mezkûra ve mâ-yahdesü minhum ve cenîn-i merkūmun demm ü diyetine müte‘allika âmme-i da‘vâdan müvekkile-i mezbûre diğer Emine Hatun ile zevci vekîl-i mezbûr Sıvacı el-Hâc Abdurrahman’ın zimmetlerini bi’l-asâle ve bi’l-vekâle ibrâ eylediğimde ol dahi ber-vech-i meşrûh ibrâmı kabûl edip bu vechile kat‘-ı münâza‘a eyledik deyü ikrâr ve tasdîkleri bi’[l]-iltimâs huzûr-ı âlîlerine i‘lâm olundu. Fî 26 M sene [1]221.