Galata Mahkemesi 580 Numaralı Sicil (H. 1221-1222 / M. 1806-1808) cilt: 84, sayfa: 100 Hüküm no: 48 Orijinal metin no: [4b-8] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Boyacıoğlu Andon v. Agop’un sattığı kürk bedelinden Moravî Hüseyin b. Ömer’den sekiz yüz guruş alacağı olduğu Mahmiye-i İstanbul’da Sofcular Hanı’nda mütemekkin sarraf tâifesinden Boyacıoğlu Andon v. Agop zimmî Galata Bâb Mahkemesi’nde meclis-i şer‘-i kavîmde Topçu kullukçularından Karslı Mehmed Çavuş mübâşeretiyle ihzâr olunan Moravî Hüseyin b. Ömer ile terâfu‘larında mezbûr Hüseyin bundan akdem mâlımdan ve yedimden safka-i vâhide iştirâ ve kabz eylediği cins ve adedi ma‘lûm semmur kürk semeninden zimmetinde sekiz yüz guruş alacak hakkım olup hattâ ol kadar guruş cihet-i merkūmeden zimmetinde bana deyni olduğunu târih-i i‘lâmdan kırk bir gün mukaddem hân-ı merkūmda mahzar-ı şuhûdda mezbûr Hüseyin ikrâr ve işhâd dahi ettikden sonra yedime memhûr temessük dahi i‘tâ etmekle hâlâ taleb ederim deyü ba‘de’d-da‘vâ ve’l-inkâr müdde‘î-i mesfûr Andon zimmî ber-vech-i meşrûh müdde‘âsını lede’t-tezkiye makbûlü’ş-şehâde idükleri ihbâr olunan Mehmed Ârif Efendi b. Mehmed ve es-Seyyid Mahmud Efendi b. Hasan şehâdetleriyle bi’l-muvâcehe ber-nehc-i şer‘î isbât etmeğin mûcebince meblağ-ı mezkûrun sekiz yüz guruşu müdde‘î-i mesfûr Andon zimmîye edâ ve teslîme mezbûr Hüseyin’e tenbîh olunduğu bi’l-iltimâs huzûr-ı âlîlerine [i‘lâm olundu.] Fî 11 Safer sene [1]221.