Galata Mahkemesi 580 Numaralı Sicil (H. 1221-1222 / M. 1806-1808) cilt: 84, sayfa: 100 Hüküm no: 49 Orijinal metin no: [5a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Eleni bt. Yani’nin çocuğunun düşmesine sebep olan vekil Paşalı Sfelyan yerine onun müvekkili Ziso v. Yani aleyhine açtığı diyet davasının meşru olmadığı Galata’da Sultan Bayezid Mahallesi’nde mütemekkin olup husûs-ı âtîde kendi nefsinden asîl ve zevcesi Eleni bt. Yani Nasrâniye tarafından ber-vech-i câ’î vekîl olduğu şahsını ârifân Nikoli v. Zakari ve Marko v. Yani zimmîler şehâdetleriyle sâbit olan Angeli v. Kostantin zimmî Galata Bâb Mahkemesi’nde meclis-i şer‘-i kavîmde Ziso v. Yani zimmî muvâcehesinde mahalle-i merkūmede vâki‘ mersûm Ziso zimmînin taht-ı icâresinde olan bir bâb menzilin bir odasında ben zevcem mersûme ile bi’l-ma‘iyye müşâhereten müstecir olmamızla oda-i merkūme icâresinden zimmetimde müctemi‘ olan meblağ-ı merkūmu benden mütâlebe için târih-i i‘lâmdan dört gün mukaddem menzil-i mezkûr mutasarrıfı tarafından îcârâtı kabza vekîli gāib ani’l-meclis Paşalı tâifesinden Sfelyan nâm kimesne menzil-i mezkûra nehâren duhûl ve ücret-i müctemi‘a-i merkūmeyi zevcem müvekkile-i mersûmeden taleb eyledikde zevcem müvekkilem mersûme havfından nâşî müstebînü’l-hilka bir cenînü’l-meyyit ilkā etmekle ben oda-i merkūmeyi mücerred mersûm Ziso zimmîden istîcâr etmiş olmamla cenîn-i merkūmun mûcib-i şer‘îsi zimmî-i mersûmdan bi’l-asâle ve bi’l-vekâle taleb ederim deyü tasaddî eylediği da‘vâsı takrîr-i meşrûhu üzere meşrû‘a ve mu‘tebere olmadığı müdde‘î-i mersûma tefhîm-birle zimmî-i mersûme bî-vech-i şer‘î mu‘ârazadan men‘ olunduğu bi’l-iltimâs huzûr-ı âlîlerine i‘lâm olundu. Fî 6 S sene 1221.