Galata Mahkemesi 580 Numaralı Sicil (H. 1221-1222 / M. 1806-1808) cilt: 84, sayfa: 101 Hüküm no: 50 Orijinal metin no: [5a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Yağcı Ali Beşe ile karısı Fâtıma ve oğlu Mehmed Emin’in uygunsuz hareketlerinden dolayı bulundukları Yolcuzâde Mahallesi’nden çıkarıldıkları Ashâb-ı arzuhâl mahrûse-i Galata’da Yolcuzâde Mahallesi imâmı Mehmed Habib Efendi ve müezzini Hâfız es-Seyyid Halil ve ahâlîsinden Ömer Ağa ve es-Seyyid Ali Odabaşı ve es-Seyyid Mustafa Ağa ve es-Seyyid Osman Ağa ve Kahveci Mehmed Beşe ve Makaracı Mehmed Beşe ve Hayyât Mehmed Beşe ve Kahveci Ahmed Beşe ve Mavnacı Ahmed Beşe ve Keresteci Molla Mustafa ve Koltukçu Ahmed Beşe ve es-Seyyid el-Hâc Mehmed Ağa ve Mavnacılar Kethüdâsı Yahya Beşe ve Sandıkçı Mehmed beşe ve Hayyât Molla Abdullah ve Tabancacılar Kethüdâsı Osman Beşe ve İbrahim Reis ve Hayyât Ali Beşe ve Nakkāş Hasan Odabaşı ve Keresteci Molla Salih ve Mavnası Veliyüddin Beşe ve Yorgancı Molla Hüseyin nâm kimesneler mahrûse-i mezbûrede meclis-i şer‘-i münîrde derûn-ı arzuhâlde mezkûretü’l-ism Fâtıma bt. Ali b. Abdurrahman nâm hatunun zevci ve tarafından husûs-ı âtîde vekîl olduğu zâtını ârifân Mustafa b. Hasan ve Abdullah b. Mahmud şehâdetleriyle zâhir olan Yağcı Ali Beşe b. Halil ve oğlu Mehmed Emin muvâcehelerinde her biri tazallüm-ı hâl ederler ki mezbûrûn mahallemizde sâkinler olup lâkin müvekkile-i mezbûre Fâtıma Hatun ile oğlu mezbûr Mehmed Emin kendi hâllerinde olmayıp bed-lisân olmalarıyla leyl ü nehâr herbiri yed ve lisânıyla bilâ-mûcib herbirimizi ta‘cîz ve tekdîrden hâlî olmadıkları ecilden ıyâl ve evlâdlarımıza ve hetk-i ırz irâdesiyle bi’l-muvâcehe bize şütûm-ı galîza ile şetm-birle mezbûrândan herbirlerinin harekât-ı nâ-marziyyeye tasaddî ve mübâderet âdet-i müstemirreleri olmağın bi’d-defa‘ât kendilere nush ve tenbîh eylediğimizde kat‘â mütenebbihler olmayıp ızrârlarında kemâ-kân ısrâr etmeleriyle zevci es-Seyyid vekîl-i mezbûr Ali Beşe eğerçi kendi hâlinde olup lâkin zevcesi müvekkile-i mezbûre ile oğlu merkūm Mehmed Emin Beşe’yi bir vechile zabt u rabta ve terbiye ve tedîbe iktidârı olmayıp mezbûrun hâtırına mürâ‘aten ber-vech-i meşrûh mezbûrânın cevr u ezâlarına tahammül etmek üzere iken zamân-ı târih-i i‘lâmdan çend rûz mukaddem oğlu mezbûr Mehmed Emin Beşe sekrân olduğu hâlde zümre-i huffâz ve şürefâdan olan müezzinimiz mezbûr Hâfız es-Seyyid Halil’i bi-gayr-ı hak darb ve ta‘zîri mûcib lafzla şetm etmekle ol vechile müvekkile-i mezbûre Fâtıma Hatun ile oğlu merkūm Mehmed Emin Beşe’den bir vechile hoşnûd ve râzı değilleriz deyü bi’l-muvâcehe teşekkî ve ber-vech-i meşrûh sû’-i hâllerini ba‘de’l-ihbâr müvekkile-i mezbûre Fâtıma Hatun’un ve zevci vekîl-i mezbûrun ve oğlu merkūmun mahalle-i mezkûreden hurûcları bâbında müekked fermân-ı âlîleri sudûrunu bi-ecmâ‘ihim istirhâm ve istid‘â-yı inâyet eyledikleri bi’l-iltimâs huzûr-ı âsafânelerine i‘lâm olundu. Fî 6 S sene [1]221.