Galata Mahkemesi 580 Numaralı Sicil (H. 1221-1222 / M. 1806-1808) cilt: 84, sayfa: 102 Hüküm no: 51 Orijinal metin no: [5a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed Beşe’nin satın aldığı sefîne için Ahmed Beşe’ye verdiği parasının satışın iptal edilmesi üzerine kendisine iâdesine karar verildiği Galata’da sâkin Mehmed Beşe b. Mehmed Salih nâm kimesne Galata Bâb Mahkemesi’nde meclis-i şer‘de Ahmed Beşe b. Veliyüddin nâm kimesne muvâcehesinde Galata’da Azabkapısı İskelesi pîşgâhında merbût “çekdirme” tâ‘bir olunur bir kıt‘a sefîne mezbûr Ahmed Beşe’nin yedinde mülkü iken mezbûr Ahmed Beşe sefîne-i merkūmeyi altı yüz guruşa bana bey‘ eder oldukda semen-i mezkûra gāib ani’l-meclis Ömer Beşe kefîl olmak şartıyla târih-i i‘lâmdan sekiz gün mukaddem mezbûr Ahmed Beşe sefîne-i merkūmeyi bana altı yüz guruşa bey‘ ve sefîne-i merkūmeyi teslîm edip lâkin gāib-i mezbûr Ömer Beşe meclis-i bey‘de hâzır olduğu hâlde kefâletini kabûl etmeyip müfterik olmamızla bey‘-i merkūmun fesâdına binâen sefîne-i merkūmeyi yedimden ahz-birle semeni olmak üzere ber-vech-i peşin yedimden makbûz olan üç yüz guruşu bana geri teslîme mezbûr Ahmed Beşe’ye tenbîh olunmak matlûbumdur deyü da‘vâ eyledikde ol dahi ber-vech-i muharrer ikrâr u i‘tirâf etmeğin mûcebince sefîne-i merkūmeyi geri ahz-birle makbûzu olan meblağ-ı mezkûr üç yüz guruşu müdde‘î-i mezbûr Mehmed Beşe’ye redd ü teslîme mezbûr Ahmed Beşe’ye bi’l-iltimâs [huzûr-ı âlîlerine i‘lâm olundu.] Fî 7 Safer sene [1]221.