Galata Mahkemesi 580 Numaralı Sicil (H. 1221-1222 / M. 1806-1808) cilt: 84, sayfa: 104 Hüküm no: 56 Orijinal metin no: [5b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Seyyid Ali Reis’in emanet ettiği demiri kullandığı iddiasıyla Seryanos v. İspondoli aleyhine açtığı alacak davasında yirmi beş guruşa sulh olduğu es-Seyyid Ali Reis b. Hüseyin Galata Bâb Mahkemesi’nde meclis-i şer‘de Seryanos v. İspondoli zimmî muvâcehesinde ben târih-i i‘lâmdan bir sene mukaddem Tekfurdağı’nda yedimde mâlım olan kırk dört guruş kıymetli bir kantar sefîne demirimi bi-tarîkı’l-âriye mersûm Seryanos zimmînin yedine îdâ‘ ve teslîm eylediğimde mersûm Seryanos zimmî dahi te‘addîsiyle istihlâk etmekle kıymet-i mezkûresi olan meblağ-ı merkūm kırk dört guruşu taleb ederim deyü tasaddî eylediğim da‘vâmdan bâ-tavassut-ı muslihîn mersûm Seryanos zimmî ile yirmi beş guruşa ba‘de’s-sulh ve’l-kabûl mâ‘adâ on dokuz guruşa müte‘allika da‘vâdan mersûm Seryanos zimmînin zimmetini kabûlü hâvî ba‘de’l-ibrâ ibrâdan müstesnâ bedel-i sulh-ı merkūm yirmi beş guruş zimmetinde kalmağla hâlâ taleb ederim deyü ba‘de’d-da‘vâ ve’l-ikrâr alâ-mûcibi ikrârihi meblağ-ı bâkī-i merkūm yirmi beş guruşun müdde‘î-i mezbûr Ali Reis’e edâsıyla mersûm Seryanos zimmî ilzâm olunduğu bi’l-iltimâs [huzûr-ı âlîlerine i‘lâm olundu.] Fî 11 Safer sene [1]221.