Galata Mahkemesi 580 Numaralı Sicil (H. 1221-1222 / M. 1806-1808) cilt: 84, sayfa: 112 Hüküm no: 75 Orijinal metin no: [7a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Magdeline bt. Yorgi’nin doğramacı dükkanı gediğindeki hissesini tek başına zapt ettiği iddiasıyla kardeşi Foti aleyhine açtığı davada altmış guruşa sulh olduğu Mübârek rikāb-ı kamer-tâb-ı mülûkâneye takdîm olunan işbu arzuhâl derûnunda isimleri mersûm Dimitri v. Yorgi zimmî ile li-ebeveyn kız karındaşı şahsı mu‘arrefe Magdeline Nasrâniye Çarşamba günü Dîvân-ı âlîlerinde ba‘dehû Galata Mahkemesi’nde ma‘kūd meclis-i şer‘-i münîrde li-ebeveyn âhar karındaşları sâhib-i arzuhâl Foti zimmî muvâcehesinde Galata’da Kemankeş Karamustafapaşa Mahallesi’nde kâin bir kıt‘a doğramacı dükkânı derûnunda mevcûd beyne’l-hiref gedik tâ‘bir olunur bâ-defter-i müfredât âlât-ı lâzıme-i ma‘lûme babamız mersûm Yorgi zimmînin ile’l-helâk yedinde mülkü iken ba‘de helâkihî beş sehm i‘tibârıyla bize mevrûs olmağla karındaşım mersûm Foti zimmî âlât-ı merkūmeyi müstakillen zabt etmekle üç sehm hissemizi karındaşımız mersûmdan taleb ederiz deyü da‘vâ eylediklerinden ol dahi cevâbında âlât-ı mezkûre babaları mersûmun ile’l-helâk yedinde mülkü olup ba‘de helâkihî beş sehm i‘tibârıyla kendilere mevrûs olduğunu ikrâr edip lâkin karındaşlarım müdde‘iyân-ı mersûmân bundan akdem âlât-ı mezkûrede irsen mâlik oldukları üç sehm hisse-i mezkûrelerini üç yüz guruş semen-i makbûza bi-safkatin vâhidetin bana bâtten ve sahîhan bey‘ ve temlîk ve teslîm ben dahi iştirâ ve tesellüm ve kabûl edip hattâ işbu yedimde olan bir kıt‘a i‘lâm-ı şer‘î mantûkunca iki yüz on beş senesi Şa‘bânı’nın on altıncı günü Galata’da Askerî Kassâmı bulunan müderrisîn-i kirâmdan es-Seyyid Süleyman Efendi huzûrunda karındaşlarım müdde‘iyân-ı mersûmândan mersûm Dimitri asâleten ve mesfûre Magdeline Nasrâniye’nin zevci gāib ani’l-meclis Hıristo zimmî dahi vekâleten âlât-ı mezkûrede i‘tibâr-ı merkūm üzere üç sehm hisselerini üç yüz guruşa bâtten ve sahîhan bey‘ ve teslîm eylediklerini herbiri asâleten ve vekâleten ikrâr u i‘tirâf etmişler idi deyü mazmûnu takrîr-i meşrûhuna mutâbık mûmâ-ileyhin hatemini hâvî bir kıt‘a i‘lâm-ı mezkûru ibrâzıyla ba‘de’d-def‘ ve’s-suâl mersûm Dimitri def‘-i mezkûru bi-tamâmihî ikrâr u i‘tirâf etmekle mûcebince bî-vech-i şer‘î mu‘ârazadan ba‘de’l-men‘ ve mersûme Magdeline Nasrâniye def‘-i mezkûru külliyyen inkâr etmeğin beyâna ba‘de’l-havâle dâfi‘-i mersûm Foti zimmî def‘-i mezkûruna ikāmet-i beyyine esnâsında beynlerine muslihûn tavassut edip mesfûre Magdeline Nasrâniye tasaddî eylediği da‘vâ-yı mezkûresinden karındaşı mersûm Foti zimmî ile altmış guruş bedel-i makbûza sulh olup husûs-ı mezkûra ve babası hâlik-i mersûmun bi’l-cümle terekesine müte‘allika âmme-i de‘âvîden karındaşı mersûm Foti zimmî ile altmış guruş bedel-i makbûza sulh olup husûs-ı mezkûra ve babası hâlik-i mersûmun bi’l-cümle terekesine müte‘allika âmme-i de‘âvîden karındaşı mesfûr Foti zimmînin zimmetini ibrâ ve iskāt ol dahi ber-vech-i muharrer sulh ve ibrâyı kabûl-birle kat‘-ı münâza‘a eyledikleri tescîl ve huzûr-ı âlîlerine i‘lâm olundu. Fî 13 Safer sene [1]221.