Galata Mahkemesi 580 Numaralı Sicil (H. 1221-1222 / M. 1806-1808) cilt: 84, sayfa: 114 Hüküm no: 78 Orijinal metin no: [7a-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Sarraf Üstüyan v. Melkon’un Çıkıkçı Anna bt. Vartan’dan damadı Anparsom’a kefaletinden dolayı iki bin beş yüz guruş alacağı olduğu Mahmiye-i İstanbul’da Çakmakçılar kurbünde Yeni Han’da mütemekkin Sarraf Üstüyan v. Melkon nâm zimmî Galata Bâb Mahkemesi’nde meclis-i şer‘de mahrûse-i Galata’da Sultan Bayezid Mahallesi’nde mütemekkine mu‘arrefetü’ş-şahs Çıkıkçı Ana bt. Vartan nâm Nasrâniye muvâcehesinde Nasrâniye-i merkūmenin damadı zeyt yağcı gāib ani’l-meclis Anparsom v. Kirkor nâm zimmî zimmetinde Ermeniyyü’l-ibâre bâ-temessük cihet-i karzdan alacak hakkım olan üç bin guruşun beş yüz guruşunu damadı gāib-i mersûm yedinden ba‘de’l-ahz bâkī kalan iki bin beş yüz guruşa hân-ı merkūmda mütemekkin olduğum odamda bin iki yüz yirmi senesi Zi’l-ka‘detü’ş-şerîfe’nin yirmi birinci günü bi’l-emr ve’l-kabûl Nasrâniye-i mersûme kefîl ve zâmine olmağla bi-hükmi’l-kefâle meblağ-ı mezkûr iki bin beş yüz guruşu Nasrâniye-i mersûmeden taleb ederim deyü ba‘de’d-da‘vâ ve’l-inkâr müdde‘î-i mesfûr Üstüyan zimmî ber-vech-i muharrer müdde‘âsını mahallinde lede’t-tezkiye makbûlü’ş-şehâde idükleri ihbâr olunan mahmiye-i merkūmede Mercan Çarşısı’nda mütemekkin Attâr Bogos v. Abraham ve hân-ı merkūmda mütemekkin Sarraf Karabet v. Asvador nâm zimmîler şehâdetleriyle mersûme Anna Nasrâniye muvâcehesinde vech-i şer‘î üzere isbât etmeğin mûcebince meblağ-ı mezkûr iki bin beş yüz guruşu müdde‘î-i mesfûr Üstüyan zimmîye bi-hükmi’l-kefâle edâ ve teslîme mersûme Anna Nasrâniye’ye tenbîh olunduğu tescîl bi’[l]-iltimâs [huzûr-ı âlîlerine i‘lâm olundu.] Fî 24 S sene [1]221.