Galata Mahkemesi 580 Numaralı Sicil (H. 1221-1222 / M. 1806-1808) cilt: 84, sayfa: 117 Hüküm no: 83 Orijinal metin no: [7b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kara Mustafa b. İsmail’in kendisine riba olarak vermeyi vaat ettiği parayı vermediği iddiasıyla Terzi Bogos v. Kiragos aleyhine açtığı davasının meşru olmadığı Hâssa hasekilerinden derûn-ı arzuhâlde mezkûrü’l-ism Kara Mustafa b. İsmail Galata Bâb Mahkemesi’nde meclis-i şer‘de arzuhâl eden Hayyât Bogos v. Kiragos zimmî muvâcehesinde mersûm Bogos zimmî bundan akdem yedimden ve mâlımdan istidâne ve kabz eylediği beş yüz guruş deyni mukābelesinde Galata hâricinde Hüseyin Ağa Mahallesi’nde vâki‘ mutasarrıf olduğu ma‘lûmü’l-hudûd ve’l-müştemilât bir bâb vakıf menzilini bi-tarîkı’l-vefâ bana fâriğ oldukdan sonra menzil-i merkūmu tahliye ve teslîm bulunmaksızın zimmî-i mersûm bir müddet temekkün edip ba‘dehû meblağ-ı merkūm beş yüz guruşu bana tamamen def‘ u teslîm ben dahi yedinden kâmilen ahz u kabz ve menzil-i merkūmu sâhib-i evveli mersûm Bogos zimmîye re’y-i mütevellîyle geri ferağ etmişidim lâkin zimmî-i mersûm deyn-i merkūm için mâlından bilâ-devr ribâ nâmıyla bana yüz seksen beş guruş vermeğe va‘ad ve karz unvânıyla işbu bir kıt‘a temessük dahi i‘tâ etmekle meblağ-ı merkūmu mücerred va‘ad-i merkūma ve temessük-ı mezkûre binâen bana mâlından vermeğe zimmî-i mersûma cebr ve tenbîh olunmak matlûbumdur deyü tasaddî eylediği da‘vâsı takrîr-i meşrûhu üzere meşrû‘a ve iltifâta şâyân olmamağla meblağ-ı merkūm yüz seksen beş guruş mütâlebesiyle mersûm Bogos zimmîye bî-vech-i şer‘î mu‘ârazadan men‘ olunduğu mübâşirleri ser-bostâniyân-ı hâssa izzetlü ağa kulları tarafından Haseki Ali mübâşeretiyle huzûr-ı âlîlerine i‘lâm olundu. Fî 27 S sene [1]221.