Galata Mahkemesi 580 Numaralı Sicil (H. 1221-1222 / M. 1806-1808) cilt: 84, sayfa: 118 Hüküm no: 85 Orijinal metin no: [7b-6] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Haseki Mustafa Ağa’nın Terzi Yoseb v. Ohannes’ten mahkeme ilamıyla kesinleşmiş yüz guruş alacağı olduğunu ispat ettiği Derûn-ı arzuhâlde mezkûrü’l-ism Haseki Mustafa Ağa b. İsmail nâm kimesne Galata Bâb Mahkemesi’nde meclis-i şer‘de sâhib-i arzuhâl Derzi Yoseb v. Ohannes nâm zimmî muvâcehesinde mersûm Yoseb zimmî zimmetinde bâ-i‘lâm-ı şer‘î mahkûmün-bih yüz guruş alacak hakkım olmağla hâlâ taleb ederim deyü ba‘de’d-da‘vâ ve’l-inkâr müdde‘î-i mezbûr Mustafa Ağa ber-vech-i muharrer müdde‘âsını ve mazmûn-ı i‘lâm-ı mezkûru lede’t-tezkiye makbûlü’ş-şehâde idükleri ihbâr olunan Mustafa Ağa b. Mehmed ve Kullukçu Mehmed Çavuş b. İsmail nâm kimesneler şehâdetleriyle mersûm Yoseb zimmî muvâcehesinde vech-i şer‘î üzere isbât etmeğin mûcebince meblağ-ı mezkûr yüz guruş müdde‘î-i mezbûr Mustafa Ağa’ya edâ ve teslîme mersûm Yoseb zimmîye tenbîh olunduğu bi’l-iltimâs mübâşirleri ser-bostâniyân-ı hâssa izzetlü ağa kulları tarafından Haseki Ali kulları yediyle huzûr-ı âlîlerine i‘lâm olundu. Fî 28 Safer sene 1221.