Galata Mahkemesi 580 Numaralı Sicil (H. 1221-1222 / M. 1806-1808) cilt: 84, sayfa: 118 Hüküm no: 86 Orijinal metin no: [8a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Elleri ve ayakları bağlandıktan sonra iple boğularak öldürülen Zümrüd adlı Nasraniye’nin naaşının yerinde keşfolunarak defnedildiği Zikri âtî husûsu tahrîr ve zahîre ihrâc için bâ-fermân-ı âlî ta‘yîn buyrulan asesbaşı ve subaşı ve Galata voyvodası efendi dâ‘îleri tarafından mürsel subaşı ve ases ümenâ-i şer‘le Galata hâricinde Saray-ı Sultânî kurbünde kâin derûn-ı arzuhâlde mezkûr menzile varıp menzil-i mezkûrun köşe ve bucakların ve sâir mazanne olan mahallerin yegān yegān mu‘âyene ve taharrî eylediklerinde derûn-ı arzuhâlde zikrolunduğu üzere bundan mukaddemce telef ve zâyi‘ olan Zümrüd nâm Nasrâniye’nin lâşesini menzil-i mezkûrun nerdübânı tahtında medfûn bulup zahîre ihrâc ve nisvân tâifesine irâet eylediklerinde sağ eli sağ ayağına merbût olduğu hâlde urgan tâ‘bir olunur ip ile boğu[lu]p el-ân boğazında ip mevcûd olduğunu ba‘de’l-mu‘âyene ve’l-ihbâr lâşesini hufre ilkā eylediklerini mahallinde tahrîr ve meclis-i şer‘a inhâ olunduğu imtisâlen li’l-emri’l-âlî Galata Mahkemesi’nden huzûr-ı âlîlerine i‘lâm olundu. Fî 28 Safer sene [1]221.