Galata Mahkemesi 580 Numaralı Sicil (H. 1221-1222 / M. 1806-1808) cilt: 84, sayfa: 120 Hüküm no: 89 Orijinal metin no: [8a-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mariçe bt. Bilan’ın eşyalarını gasp ettikleri iddiasıyla Yahûdi Lehli Alef ve karısı Hanna aleyhine açtığı davada iddiasını ispat edemediği Arzuhâl eden şahsı mu‘arrefe Mariçe bt. Bilan Nasrâniye Çarşamba günü Dîvân-ı âlîlerinde ba‘dehû Galata Mahkemesi’nde ma‘kūd meclis-i şer‘de Lehli Alef v. Sahak Yahûdi ile zevcesi kezâlik şahsı mu‘arrefe Hanna bt. Mosi Yahûdiye muvâcehelerinde mersûme Mariçe’nin zevci Nemçeli Anton v. Yoseb ve Nemçe Tercümânı İklisli hâzır oldukları hâlde Galata hâricinde Tomtom Mahallesi’nde kâin menzilin bir odasında ben zevcim hâzır-ı mersûm ile ve bir odasında mesfûr Alef Yahûdi zevcesi mersûme Hanna ile müsteciren temekkünler iken târih-i i‘lâmdan iki buçuk ay mukaddem oda-i merkūm derûnunda mevcûd mâlımdan mecmû‘u dokuz yüz yetmiş guruş kıymetli dördü bürüncek ve yedisi penbezâr on bir gömlek ve patiska tâ‘bir olunur Efrencî beş gömlek ve pullu cânfese kaplı zennekârî bir kākum kürk ve beş çukaya kaplı bir sansar kürk ve bir sim tabak ve iki sim kaşık ve üç beyâz çârşeb ve iki beyâz fisdân ve bir mâî harîr şalvar ve üç boğası yelek, dört çuka şalvar ve bir hotoz ve iki tencere ve iki kapağımı zevcân-ı mersûmân Alef ve Hanna bi-gayr-ı hak ahz etmeleriyle mevcûd ise a‘yânını müstehlek ise ba‘de’s-sübût kıymetlerini zevcân-ı mersûmândan taleb ederim deyü ba‘de’d-da‘vâ ve’l-istintak onlar dahi külliyyen ba‘de’l-inkâr müdde‘iye-i mersûme ber-vech-i muharrer müdde‘âsına ikāmet-i beyyineden izhâr-ı acz edip tahlîfe dahi tâlibe olmamağın mûcebince müdde‘iye-i mersûme Mariçe Nasrâniye da‘vâ-yı mezkûresiyle zevcân-ı mersûmâna bilâ-beyyine mu‘ârazadan men‘ olunduğu bi’l-iltimâs [huzûr-ı âlîlerine i‘lâm olundu.] Fî 21 Safer sene [1]221.