Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 822 Hüküm no: 1072 Orijinal metin no: [128b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Hatice bt. Abdullah’ın Girit seferine giden kocası Mustafa Ağa’nın Murtaza Beşe’ye bıraktığı parayı aldığı Mahmiye-i İstanbul’da Muhsine Hâtun mahallesinde sâkine râfi‘atü’l-kitâb Hatice bt. Abdullah nâm hâtun mahfil-i kazâda Murtaza Beşe b. Ali nâm kimesne mahzarında üzerine da‘vâ ve takrîr-i kelâm edip zevcim olup hâlâ Girit Seferi’nde olan Mustafa Ağa b. ( )’nin mezbûr Murtaza Beşe zimmetinde cihet-i deyn-i şer‘îden on beş bin akçe hakkı olup hattâ mezbûr Murtaza Beşe zevcim mezbûr Mustafa Ağa’ya vech-i muharrer üzre cihet-i mezbûreden deyni olduğunu şuhûd mahzarında ikrâr ve yedine deyn-i mezkûru nâtıka tezkire dahi verdikden sonra meblağ-ı mezbûru bana def‘ ve teslîme mezbûr Murtaza Beşe’ye emr ettikden sonra meblağ-ı mezbûrun sekiz yüz akçesini bana def‘ [ve] teslîm etmişiken hâlâ mâ‘adâsını teslîmden imtinâ‘ eder suâl olunup alıverilmesi matlûbumdur dedikde gıbbe’s-suâl ve a‘kībe’l-inkâr müdde‘iyye-i mezbûreden müdde‘âsını mübeyyine beyyine taleb olundukda udûl-i müslimînden olup mahmiye-i mezbûrede İbrahim Paşa mahallesi sükkânından es-Seyyid Halil Çelebi b. Mehmed ve Mustafa b. Abdullah ve Ahmed Bey b. Süleyman nâm kimesneler meclis-i şer‘a li ecli’ş-şehâde hâzırûn olup isre’l-istişhâd fi’l-vâki‘ mezbûr Murtaza Beşe gāib-i merkūm Mustafa’ya cihet-i mezbûreden vech-i muharrer üzre on beş bin akçe deyni olduğunu bi tav‘ihî bizim huzûrumuzda ikrâr ve i‘tirâf edip bizi işhâd eyledikden sonra hattâ mezbûr Mustafa Ağa meblağ-ı mezbûru zevcesi müdde‘iyye-i mezbûre Hatice’ye edâ ve teslîm eylemeye mezbûr Murtaza Beşe’ye emredip merkūm Murtaza Beşe dahi meblağ-ı mezbûru merkūme Hatice’ye verecek oldu, biz bu husûsa bu vech üzre şâhidleriz şehâdet dahi ederiz deyû her biri edâ-i şehâdet-i şer‘iyye eylediklerinde ba‘de ri‘âyeti şerâiti’l-kabûl şehâdetleri makbûle olmağın mûcebince meblağ-ı bâkī on dört bin iki yüz akçeyi müdde‘iyye-i mezbûreye edâya tenbîh birle mâ vaka‘a bi’t-taleb ketb olundu. Fi’l-yevmi’s-sânî ve’l-ışrîn min Şevvâli’l-mükerrem li sene seb‘a ve seb‘în ve elf. Şuhûdü’l-hâl: Mustafa Beşe b. Ahmed, Hasan Beşe b. Abdullah, Halil Beşe b. ( ), Mehmed Bey [b.] Abdullah.